«Ես չէի ուզում, որ մենք հետ քաշվեինք». Մելիքյանը բացատրել է Չեռնոգորիայի դեմ խաղի ավարտը

Հայաստանի հավաքականի գլխավոր մարզիչ Եղիշե Մելիքյանը պատասխանել է լրագրողների հարցերին Ազգերի լիգայի երկրորդ տուրում Չեռնոգորիայից կրած պարտությունից (2:3) հետո։ Հայաստանի հավաքականը երկու անգամ հավասարեցրեց հաշիվը, սակայն 89-րդ րոպեին բաց թողեց վճռորոշ գոլը։ Մելիքյանը խոսել է առաջին գոլին նախորդած վիճելի դրվագի, փոխարինումների պատճառների և հոկտեմբերի 2-ին Կիպրոսի դեմ կայանալիք արտագնա խաղին պատրաստվելու մասին։

Եղիշե Մելիքյանի մամուլի ասուլիսը Հայաստան — Չեռնոգորիա խաղից (2:3) հետո

— Ինչպե՞ս կգնահատեք խաղը։ Մրցավարական որոշումներն ազդե՞ցին հանդիպման ելքի վրա։

— Չեմ ուզում բողոքել մրցավարությունից, որպեսզի դա արդարացում փնտրելու տպավորություն չստեղծի։ Բայց դժգոհ եմ մրցավարությունից. կարծում եմ՝ Չեռնոգորիայի առաջին գոլից առաջ Էրիկ Փիլոյանի նկատմամբ խախտում կար։ Այս մասին այլևս չեմ ուզում խոսել։

Մենք ունեինք Ա և Բ պլաններ։ Առաջին խաղակեսում գործեցինք Ա պլանով, ընդմիջումից հետո փոխեցինք խաղաոճը։ Երկրորդ խաղակեսում առավելություն ունեինք և լավ ճնշում էինք գործադրում։ Ցավալի է, որ չկարողացանք դրական արդյունքի հասնել։ Ներողություն ենք խնդրում երկրպագուներից և շնորհակալություն հայտնում աջակցության համար։

Խաղից հետո շատ հիասթափված էինք։ Եղան անհատական սխալներ, որոնց համար պատժվեցինք, բայց ընդհանուր առմամբ գոհ եմ ֆուտբոլիստներից։ Տեսա նրանց նվիրվածությունը թիմին և վստահ եմ, որ այս թիմը լավ ապագա ունի։ Մենք շարունակելու ենք պայքարել։ Ամբողջ պատասխանատվությունն ու ճնշումը վերցնում եմ ինձ վրա, իսկ ֆուտբոլիստները պետք է կենտրոնանան հաջորդ խաղին պատրաստվելու վրա։

— Խաղի վերջնամասում թվում էր, թե Հայաստանը կարող է երրորդ գոլը խփել, բայց թիմը սկսեց ավելի խորքից խաղալ և Չեռնոգորիային թույլ տվեց ավելի հաճախ տիրել գնդակին։ Ինչո՞ւ չհաջողվեց պահպանել ճնշումը։

— Հավասար հաշվի պայմաններում չէինք պատրաստվում անցնել պաշտպանության։ Խաղի ընթացքում տեսնում էի, որ կարող ենք հաղթել, և անընդհատ ֆուտբոլիստներին ցույց էի տալիս, որ առաջ գնան։ Բայց պետք է հաշվի առնել նրանց ֆիզիկական վիճակը. կազմում կան նորեկներ և ֆուտբոլիստներ, որոնք քիչ խաղային պրակտիկա են ունեցել։ Մենք սկսեցինք ավելի խորքից խաղալ, թեև ես դա չէի ուզում։ Չեռնոգորիան էլ իր հերթին գնաց հաղթանակի հետևից և խաղադաշտ դուրս բերեց թարմ ֆուտբոլիստների։

— Խաղից առաջ ասել էիք, որ առաջին տեղի համար պայքարում կարևոր է առնվազն չպարտվել Չեռնոգորիային։ Ինչպե՞ս եք հիմա գնահատում թիմի հնարավորությունները։

— Դրա մասին խոսելը դեռ վաղ է. առջևում ևս չորս խաղ կա։ Շատ ցավալի է, որ միավորներ կորցրինք, բայց ոչինչ կորած չէ։ Կադրային կորուստներ ունենք, իսկ երկու խաղից հետո ռոտացիայի հնարավորությունները քիչ են մնացել։ Կփորձեմ առավելագույնը ստանալ այս կազմից։ Հավատում եմ ֆուտբոլիստներին և կարծում եմ, որ թիմը ճիշտ ուղղությամբ է շարժվում։

— Ինչպե՞ս կգնահատեք Օգնեն Չանչարևիչի խաղը։ Նա մեղավո՞ր էր բաց թողած գոլերի համար։

— Օգնենը շատ լավ և հուսալի դարպասապահ է։ Այո՛, երկրորդ գոլի դրվագում նա սխալվեց՝ չափազանց հեռու դուրս գալով դարպասից։ Բայց նման բան պատահում է նույնիսկ համաշխարհային ֆուտբոլի աստղերի հետ։ Ընդհանուր առմամբ գոհ եմ նրանից. նա խուճապի չի մատնվում, պահպանում է հանգստությունն ու անձնվիրաբար խաղում։ Լավ է, որ նա մեր թիմում է։

— Արթուր Միրանյանը կրկին խաղը սկսեց մեկնարկային կազմում։ Ինչո՞ւ նախապատվությունը տվեցիք նրան և ոչ թե առաջին րոպեներից խաղադաշտ դուրս բերեցիք Արթուր Ղարիբյանին։

— Այն, որ Միրանյանն օգտակար չէր, ձեր կարծիքն է։ Նա լավ էր պրեսինգի դիմում և կատարում էր մարտավարական առաջադրանքները։ Երբ հարձակվողը գոլ չի խփում, նրա խաղը հաճախ բացասական են գնահատում։ Կադրային կորուստներից, այդ թվում՝ Գրանտ-Լեոն Ռանոսի և Ֆինն Գերագուսյանի բացակայությունից հետո, մենք պետք է վստահենք Միրանյանին։ Ամռանը նա խնդիրներ ուներ ակումբում և քիչ էր խաղում, բայց հիմա ջանք է գործադրում և անում է այն ամենը, ինչ կարող է։

Ղարիբյանին ստուգեցինք հավաքի առաջին օրերին և հասկացանք, որ նա դեռ պատրաստ չէ առաջին րոպեներից խաղալու։ Հիմա կարող է խաղադաշտում անցկացնել առավելագույնը 30–40 րոպե։ Միայն այդ պատճառով նա մեկնարկային կազմում չէր։

— Լատվիայի դեմ մեկնարկային կազմում խաղաց Նարեկ Հովհաննիսյանը, իսկ Ժիրայր Շաղոյանը փոխարինման դուրս եկավ և ուժեղացրեց խաղը։ Այսօր նրանց դերերը փոխվել էին։ Նրանցից ո՞վ է հիմա ավելի մոտ մեկնարկային կազմին։

— Հիմա ավելի մոտ է Նարեկ Հովհաննիսյանը։ Բայց Շաղոյանը Լատվիայի դեմ խաղում դուրս եկավ խաղադաշտ և գոլային փոխանցում կատարեց, ուստի այսօր նրան վստահեցի տեղը մեկնարկային կազմում։ Նրա խաղից դժգոհ մնացի և ընդմիջմանը փոխարինեցի։ Այս պահին Նարեկը մեր հիմնական ձախ վինգերն է։

— Ուգոչուկվու Իվուին Կառլեն Հովհաննիսյանով փոխարինելը մարտավարակա՞ն քայլ էր, թե՞ կապված էր Իվուի վիճակի հետ։

— Երկուսն էլ շատ կարևոր են թիմի համար։ Իվուն վերջերս է վերադարձել երկարատև վնասվածքից և նոր է սկսել խաղալ։ Զգացի, որ նա շատ է հոգնել, ուստի փոխարինեցի նրան։ Նրա համար դժվար կլինի այս մրցափուլում մասնակցել բոլոր չորս հանդիպումներին։

Կառլենից շատ գոհ եմ։ Նա նույնպես մեր հիմնական ֆուտբոլիստներից է, թեև մարտավարական պատճառներով միշտ չէ, որ կարող է խաղը սկսել առաջին րոպեներից։

— Որքանո՞վ է թիմը ֆիզիկապես պատրաստ առաջիկա երկու արտագնա խաղերին։

— Իհարկե, իդեալական ֆիզիկական պատրաստվածություն չի լինի։ Բացի այդ, խաղի վերջնամասում բաց թողած գոլը հոգեբանական հարված էր։ Դրանից վերականգնվելը գուցե նույնիսկ ավելի դժվար լինի, քան ֆիզիկապես վերականգնվելը։ Կաշխատենք դրա վրա և կանենք ամեն ինչ հաջորդ խաղերին պատրաստ լինելու համար։

— Ինչպե՞ս կգնահատեք Չեռնոգորիայի խաղը։

— Չեռնոգորիան հիանալի թիմ ունի, հատկապես ուժեղ են հարձակման գծի ֆուտբոլիստները։ Շնորհավորում եմ մրցակցին հաղթանակի կապակցությամբ։ Չեմ կարող ասել, թե այն անարժան էր։ Եթե մենք հաղթեինք, դա նույնպես արժանի հաղթանակ կլիներ, բայց այսօր հաղթեց Չեռնոգորիան։ Մրցակիցը քիչ պահեր ունեցավ, սակայն ֆուտբոլիստների վարպետությունը թույլ տվեց իրացնել դրանք։ Մենք գիտեինք Չեռնոգորիայի այդ ուժեղ կողմի մասին։

— Ի՞նչ կասեք Կիպրոսի դեմ առաջիկա խաղի մասին։

— Կիպրոսը լավ թիմ է, որը ուժեղ խաղ անցկացրեց Չեռնոգորիայի դեմ։ Պետք է շատ լուրջ պատրաստվենք։ Արտագնա խաղում հաջողության հասնելու համար առնվազն պետք է խաղանք այսօրվա մակարդակով։ Եթե ավելի վատ խաղանք, դժվար կլինի երեք միավոր վաստակել։

— Արթուր Սերոբյանն օգնում էր Արտեմ Բանդիկյանին պաշտպանությունում, իսկ Ժիրայր Շաղոյանը միշտ չէ, որ հետ էր գալիս։ Դա համապատասխանո՞ւմ էր ձեր պլանին։

— Ո՛չ։ Այդ թվում՝ դրա պատճառով էլ Շաղոյանին փոխարինեցի ընդմիջմանը։ Նա պետք է օգներ պաշտպանությունում։ Յուրաքանչյուր ոք, ով հագնում է հավաքականի մարզաշապիկը, պարտավոր է պատասխանատվություն զգալ և ամբողջ ուժերը թողնել խաղադաշտում։ Եթե ֆուտբոլիստը խաղադաշտից դուրս է գալիս առանց ուժասպառ լինելու, ուրեմն չի հասկանում, թե որ թիմի համար է խաղում։ Եթե լիարժեք նվիրում չտեսնեմ, այդ ֆուտբոլիստը հավաքականում չի խաղա։