Վարազդատ Լալայանը բրոնզե մեդալ է նվաճել ծանրամարտի ԱԱ-2026-ում

Հայաստանի ներկայացուցիչ, աշխարհի կրկնակի չեմպիոն Վարազդատ Լալայանը դարձել է ծանրամարտի 2026 թվականի աշխարհի առաջնության բրոնզե մեդալակիր՝ 110 կգ-ից բարձր քաշային կարգում։ Հայ ծանրորդն ավարտել է մրցաշարը երեք մեդալով՝ արծաթ պոկում վարժությունում, բրոնզ՝ հրումում և երկամարտում։

Պոկում վարժությունում Լալայանը բարձրացրել է 210 կգ՝ ընդամենը մեկ կիլոգրամով զիջելով Իրաքի ներկայացուցիչ Ալի Ռուբայավիին։ Հրումում հայ մարզիկը գրանցել է 247 կգ արդյունք և նույնպես ընդգրկվել լավագույն եռյակում։ Երկրորդ մոտեցմամբ Լալայանի բարձրացրած 252 կգ-ը մրցավարները չեն հաշվել անհասկանալի պատճառով, ինչն էլ նրան զրկել է ոսկու համար պայքարելու հնարավորությունից։

Լալայանի երկամարտի արդյունքը կազմել է 457 կգ։ Երկամարտի արծաթե մեդալի համար պայքարում նա մեկ կիլոգրամով զիջել է իրանցի Ալիռեզա Յուսեֆիին, որը հրում վարժությունում սահմանել է աշխարհի ռեկորդ՝ 263 կգ։

Աշխարհի չեմպիոն է դարձել Իրաքի 22-ամյա ներկայացուցիչ Ալի Ռուբայավին։ Նա հաղթել է պոկում վարժությունում, երկրորդ տեղը զբաղեցրել հրումում և երկամարտում հավաքել 466 կգ։

110 կգ-ից բարձր քաշային կարգի արդյունքները

Երկամարտ․

1. Ալի Ռուբայավի (Իրաք) — 466 կգ (211+255)

2. Ալիռեզա Յուսեֆի (Իրան) — 458 կգ (195+263)

3. Վարազդատ Լալայան (Հայաստան) — 457 կգ (210+247)

Պոկում․

1. Ալի Ռուբայավի (Իրաք) — 211 կգ

2. Վարազդատ Լալայան (Հայաստան) — 210 կգ

3. Ալի Դավուդի (Իրան) — 206 կգ

Հրում․

1. Ալիռեզա Յուսեֆի (Իրան) — 263 կգ, աշխարհի ռեկորդ

2. Ալի Ռուբայավի (Իրաք) — 255 կգ

3. Վարազդատ Լալայան (Հայաստան) — 247 կգ

Հայաստանն աշխարհի առաջնությունն ավարտել է առանց ոսկե մեդալի։ Երկամարտում հավաքականի միակ մեդալը նվաճել է Լալայանը։ Փոքր մեդալները ներառյալ՝ հայ ծանրորդները նվաճել են մեկ արծաթ և երեք բրոնզ․ երեք մեդալը Լալայանի հաշվին է, ևս մեկ բրոնզ հրում վարժությունում նվաճել է Ալեքսանդրա Գրիգորյանը։

Երկամարտում նվաճած չեմպիոնական տիտղոսների քանակով առաջատարը Հյուսիսային Կորեան է՝ վեց ոսկե մեդալով։ Չինաստանի ներկայացուցիչները նվաճել են հինգ ոսկի, իսկ Եգիպտոսի, Բուլղարիայի, Ուզբեկստանի և Իրաքի մարզիկները՝ մեկական։ Եվրոպայի միակ ներկայացուցիչը, որը դարձել է աշխարհի չեմպիոն, բուլղարացի Կառլոս Նասարն է։