Տիկնիզյանը մասնակցեց ամբողջ խաղին և օգնեց «Օլիմպիակոսին» հաղթանակ կորզել 92-րդ րոպեին

«Օլիմպիակոսը» Հունաստանի առաջնության 5-րդ տուրում դժվար արտագնա հաղթանակ տարավ «Լևադիակոսի» նկատմամբ։

Հանդիպումն ավարտվեց Պիրեյը ներկայացնող թիմի՝ 1:0 հաշվով հաղթանակով։ Միակ գոլը գրանցվեց արդեն ավելացված ժամանակում․ 92-րդ րոպեին Մանոլիս Սալիակասը գլխի հարվածով եզրափակեց Ռեմո Ֆրոյլերի փոխանցումը։

Հայաստանի հավաքականի պաշտպան Նաիր Տիկնիզյանը «Օլիմպիակոսի» մեկնարկային կազմում էր և անցկացրեց ամբողջ հանդիպումը։ Հայ ֆուտբոլիստը նաև մասնակցեց իր թիմի երկարատև գոլային գրոհին, որն ավարտվեց Սալիակասի վճռորոշ գոլով։

Նաիր Տիկնիզյանի վիճակագրությունը «Լևադիակոսի» դեմ խաղում

• Սրող փոխանցումներ՝ 2
• Փոխանցումներ տուգանային հրապարակ՝ 1-ը 7-ից
• Ճշգրիտ փոխանցումներ՝ 31 (85%)
• Գնդակի կորուստներ՝ 16
• Երկարատև առաջխաղացումներ գնդակով՝ 2
• Խլումներ՝ 1
• Գնդակի հեռացումներ՝ 2
• Գնդակի վերադարձներ՝ 4
• Մենապայքարներ՝ 0-ը 2-ից
• Օդային մենապայքարներ՝ 2-ը 4-ից
• SofaScore-ի գնահատական՝ 7,0

Այսպիսով, «Օլիմպիակոսը» կարևոր երեք միավոր վաստակեց նախորդ տուրում ՕՖԻ-ից կրած պարտությունից հետո։

Այժմ Տիկնիզյանը կմիանա Հայաստանի ազգային հավաքականին, որը սկսում է նախապատրաստվել Ազգերի լիգայի առաջիկա հանդիպումներին։