Տիկնիզյանն ու Կառլեն Հովհաննիսյանը մեկնաբանել են Հայաստանի ոչ-ոքին Ղազախստանի հետ

Հայաստանի ազգային հավաքականը ընկերական խաղում ոչ-ոքի է խաղացել Ղազախստանի հետ։ Հանդիպումը կայացել է Երևանում և ավարտվել 1:1 հաշվով։ Խաղից հետո ազգային թիմի պաշտպան Նաիր Տիկնիզյանն ու կիսապաշտպան Կառլեն Հովհաննիսյանը կիսվել են իրենց տպավորություններով՝ ընդգծելով ինչպես դրական կողմերը, այնպես էլ թիմի գլխավոր խնդիրը՝ գոլային պահերի իրացումը։

Կառլեն Հովհաննիսյանի համար այս հանդիպումն առանձնահատուկ էր. կիսապաշտպանն առաջին անգամ դուրս եկավ Հայաստանի հավաքականի մեկնարկային կազմում։ Ֆուտբոլիստը խոստովանել է, որ եթե թիմը չի կարողացել հաղթել, նշանակում է՝ չի կատարել բոլոր առաջադրանքները։

«Առաջին անգամ էի խաղադաշտ դուրս գալիս մեկնարկային րոպեներից։ Ընդհանուր առմամբ, խաղը նորմալ կգնահատեմ, սակայն քանի որ չկարողացանք հաղթել, նշանակում է՝ ինչ-որ տեղ թերացել ենք և ոչ բոլոր առաջադրանքներն ենք կատարել։ Անշուշտ, մարզչական շտաբի հետ կվերլուծենք մեր դրական և բացասական կողմերը, կաշխատենք սխալների վրա։ Կարծում եմ՝ եզրափակիչ փուլում մեզ պարզապես մի փոքր չհերիքեց հաջողությունը։ Կանենք առավելագույնը, որպեսզի հաջորդ խաղում ավելի լավ հանդես գանք», — նշել է Հովհաննիսյանը։

Հանդիպման արդյունքն ավելի զգացմունքային և ինքնաքննադատաբար է գնահատել Նաիր Տիկնիզյանը։ Պաշտպանը շնորհակալություն է հայտնել երկրպագուներին աջակցության համար և ընդգծել, որ ֆուտբոլիստները շատ էին ցանկանում նրանց հաղթական էմոցիաներ պարգևել։

«Շատ ցավալի է ավարտել խաղն առանց հաղթանակի։ Առանձին ուզում եմ շնորհակալություն հայտնել այն երկրպագուներին, որոնք այսօր մարզադաշտում էին։ Նրանց աջակցությունն անգնահատելի է։ Մենք հասկանում ենք, որ հիմա հեշտ ժամանակներ չեն, բայց մարդիկ գալիս և աջակցում են մեզ։ Շատ էինք ուզում հանդիպումն ավարտել հաղթական էմոցիաներով։ Անկախ արդյունքից՝ մենք բոլոր ուժերը թողեցինք խաղադաշտում», — ասել է Տիկնիզյանը։

Պաշտպանի խոսքով՝ Հայաստանի հավաքականի խաղում կրկին սուր կերպով երևաց պահերի իրացման խնդիրը։ Տիկնիզյանը խոստովանել է, որ ինքն էլ մի քանի լավ հնարավորություն է ունեցել աչքի ընկնելու համար։

«Այսօր մեր խաղում շատ հստակ երևաց իրացման խնդիրը։ Ինքս էլ մի քանի հարմար դրվագ ունեի, որոնք, երևի, դեռ երազումս կտեսնեմ։ Անպայման հետևություններ կանենք։ Հիմա անհամբեր սպասում ենք Մոլդովայի դեմ խաղին։ Հույս ունեմ՝ հաջորդ հանդիպմանը կկարողանանք շտկել սխալները և շատ գոլեր խփել», — ավելացրել է ֆուտբոլիստը։

Հիշեցնենք, որ Եղիշե Մելիքյանի գլխավորությամբ Հայաստանի հավաքականը հաջորդ ընկերական հանդիպումը կանցկացնի հունիսի 9-ին Երևանում՝ Մոլդովայի դեմ։