Տիգրան Ավետիսյանը դարձել է ծանրամարտի Եվրոպայի Մ15 չեմպիոն
- Հեղինակ: Vahe Hakobyan
- Sportaran
Հայաստանցի պատանի ծանրորդ Տիգրան Ավետիսյանը ոսկե մեդալ է նվաճել մինչև 15 տարեկանների Եվրոպայի առաջնությունում, որն անցկացվում է Կոսովոյի մայրաքաղաք Պրիշտինայում։ Հայաստանի հավաքականի ներկայացուցիչը լավագույնն է եղել մինչև 75 կգ քաշային կարգում։
Ավետիսյանը վստահ է հանդես եկել պոկում վարժությունում՝ հաջողությամբ օգտագործելով բոլոր երեք մոտեցումները։ Նախ նա բարձրացրել է 112 կգ, ապա՝ 119 կգ, իսկ վերջին փորձի ժամանակ գլխավերևում ֆիքսել է 122 կգ։ Այս արդյունքը հայ մարզիկին փոքր ոսկե մեդալ է բերել առանձին վարժությունում։
Հրում վարժությունում Տիգրանը նույնպես հաստատել է քաշային կարգի գլխավոր ֆավորիտներից մեկի կարգավիճակը։ Նա հաջողությամբ բարձրացրել է 140 և 146 կգ և կրկին գրավել առաջին տեղը վարժությունում։
Երկամարտի արդյունքում Ավետիսյանը հավաքել է 268 կգ (122+146) և դարձել մինչև 15 տարեկան պատանիների Եվրոպայի չեմպիոն։
Երկրորդ տեղը զբաղեցրել է Վրաստանի ներկայացուցիչ Լուկասի Տոդուան՝ գրանցելով 263 կգ (118+145) արդյունք։ Բրոնզե մեդալը 239 կգ (103+136) արդյունքով նվաճել է բելառուս ծանրորդ Ուլաձիսլաու Մասիուրան։
Հայաստանի պատանեկան հավաքականը շարունակում է հաջող ելույթները Պրիշտինայում ընթացող Եվրոպայի առաջնությունում։ Տիգրան Ավետիսյանի հաղթանակից հետո Հայաստանի թիմի հաշվին երկամարտում արդեն կա մեկ ոսկե և երեք արծաթե մեդալ։