Դավիթ Սիմոնյանն ու Վաղարշակ Քեյանը բրոնզե մեդալներ են նվաճել բռնցքամարտի Եվրոպայի Մ23 առաջնությունում
- Հեղինակ: Vahe Hakobyan
- Sportaran
Հայաստանի հավաքականը Խորվաթիայի Պորեչ քաղաքում ընթացող բռնցքամարտի մինչև 23 տարեկանների Եվրոպայի առաջնությունն ավարտել է երկու բրոնզե մեդալով։ Մրցաշարի մրցանակակիրներ են դարձել Դավիթ Սիմոնյանը (90 կգ) և Վաղարշակ Քեյանը (55 կգ), որոնք նոյեմբերի 22-ին պարտվել են կիսաեզրափակիչ մենամարտերում։
Մինչև 55 կգ քաշային կարգում Վաղարշակ Քեյանը մրցել է Ուկրաինայի ներկայացուցիչ Բոգդան Չելդիկի հետ։ Երեք ռաունդների արդյունքում մրցավարները հաղթանակը շնորհել են ուկրաինացի բռնցքամարտիկին՝ 4։1 հաշվով։
Ավելի վաղ Քեյանը հաջողությամբ հաղթահարել էր մրցաշարի երկու փուլ։ Նախ հայ բռնցքամարտիկը հաղթել էր շվեդ Ջոշուա Մուինդային, ապա քառորդ եզրափակչում վստահ առավելության հասել լեհ Նիկոլաս Պավլիկի նկատմամբ՝ 5։0 հաշվով։
Մինչև 90 կգ քաշային կարգում Դավիթ Սիմոնյանը նոկաուտով պարտվել է ֆրանսիացի Ջունիոր Թադային։ Ֆրանսիացի բռնցքամարտիկը դուրս է եկել եզրափակիչ, որտեղ կմրցի Գերմանիայի ներկայացուցիչ Դավիդ Նվանյայի հետ։
Սիմոնյանը նույնպես հաջող մրցաշար է անցկացրել՝ տանելով երկու վաղաժամ հաղթանակ։ Առաջին մենամարտում նա հաղթել էր թուրք Մուհամմեթ Ֆուրկան Քարադաղին, իսկ քառորդ եզրափակչում առաջին ռաունդում նոկաուտի էր ենթարկել Անգլիան ներկայացնող, Եվրոպայի Մ19 չեմպիոն Էմանուել Ադեկալի Կարգբոյին։
Այսպիսով, Հայաստանը Եվրոպայի Մ23 առաջնությունում իր ելույթն ավարտել է երկու բրոնզե մեդալով։
Եվս մեկ բրոնզե մեդալ է նվաճել Վրաստանը ներկայացնող հայ բռնցքամարտիկ Գոռ Այվազյանը (60 կգ)։ Կիսաեզրափակչում նա պարտվել է Թուրքիայի ներկայացուցիչ Սելահաթին Չինիբուլաքին։
Պորեչում անցկացվող Եվրոպայի Մ23 առաջնությանը մասնակցում են 39 երկրների 276 բռնցքամարտիկներ։ Մրցաշարի եզրափակիչ մենամարտերը կկայանան նոյեմբերի 24-ին։