«Նոան» Էջմիածնում բացել է նոր մարզաբազա․ արարողությանը ներկա է եղել Լուիշ Ֆիգուն

Մայիսի 18-ին Էջմիածնում կայացել է «Նոա» ֆուտբոլային ակումբի նոր մարզաբազայի բացման հանդիսավոր արարողությունը։ Նոր կենտրոնը դարձել է ակումբի ամենամասշտաբային ենթակառուցվածքային նախագծերից մեկը և կարևոր իրադարձություն հայկական ֆուտբոլի համար։

Վերջին մեկուկես տարվա ընթացքում «Նոան» բազայի տարածքում կառուցել է ժամանակակից մասնաշենք, որը նախատեսված է առաջին թիմի, մարզչական շտաբի, անձնակազմի, ինչպես նաև վարչական բաժնի համար։ Ակումբի հայտարարության համաձայն՝ կառույցը համապատասխանում է եվրոպական բարձր չափանիշներին։

Նոր մասնաշենքը ներառում է ժամանակակից հանդերձարաններ, վերականգնողական սենյակներ, բժշկական և մերսման նորագույն սարքավորումներով տարածքներ, ընդարձակ մարզասրահ, հյուրանոցային համարներ ուսումնամարզական հավաքների համար, գրադարան, ճաշարան, խորհրդակցությունների դահլիճներ, աշխատանքային սենյակներ և հանգստի մի քանի գոտիներ։ Ֆուտբոլիստների համար նախատեսված են նաև սեղանի թենիսի և համակարգչային խաղերի համար նախատեսված տարածքներ։

Ֆուտբոլային կենտրոնը ներկայացվել է Հայաստանի Հանրապետության կառավարությանը, ֆուտբոլային հանրության ներկայացուցիչներին, լրատվամիջոցներին և «Նոայի» գործընկերներին։ Արարողությանը մասնակցել են «Նոայի» նախագահ Վարդգես Վարդանյանը, բարձրաստիճան պաշտոնյաներ, ինչպես նաև համաշխարհային ֆուտբոլի լեգենդ Լուիշ Ֆիգուն։

«Նոայում» նոր մարզաբազայի բացումը համարում են նոր մեկնարկ՝ ակումբի հետագա զարգացման և առաջադրված նպատակներին հասնելու ճանապարհին։ Նախագիծը պետք է դառնա ակումբի երկարաժամկետ ռազմավարության կարևոր մասը։

Էջմիածնի նոր մարզաբազան կոչված է առաջին թիմի պատրաստության և ակումբային կառույցի աշխատանքի համար ավելի որակյալ պայմաններ ստեղծելու։ Հայկական ֆուտբոլի համար նման կենտրոնի գործարկումը կարող է դառնալ ենթակառուցվածքների և պրոֆեսիոնալ միջավայրի զարգացման հերթական կարևոր քայլը։