Էդգար Սևիկյանի՝ Իսրայել տեղափոխությունը 1 մլն եվրոյով արդեն համաձայնեցված է
- Հեղինակ: Vahe Hakobyan
- Sportaran
Հունգարացի ինսայդեր Öltözőn Túl-ի տեղեկություններով՝ «Հապոել Պետահ Տիկվան» պատրաստ է «Ֆերենցվարոշին» 1 մլն եվրո վճարել 25-ամյա ֆուտբոլիստի համար։ Նշվում է, որ իսրայելական և հունգարական ակումբների միջև բանակցությունները շարունակվում են։
Միևնույն ժամանակ, հունգարական մեկ այլ աղբյուր՝ GLOBAL Fradi-ն, պնդում է, որ կողմերն արդեն վերջնական համաձայնության են եկել, և Սևիկյանի տրանսֆերը փաստացի ավարտված է։ Ակումբները դեռ պաշտոնապես չեն հաստատել գործարքը։
Սևիկյանը «Ֆերենցվարոշ» է տեղափոխվել 2024 թվականին, սակայն տրանսֆերից հետո ժամանակի զգալի մասն անցկացրել է վարձակալությամբ։ Նախորդ մրցաշրջանը ֆուտբոլիստն անցկացրել է ռուսական «Ակրոնում»։
«Ֆերենցվարոշ» վերադառնալուց հետո հայ վինգերը թիմի կազմում մասնակցել է ընդամենը երկու ոչ ամբողջական հանդիպման, իսկ վերջին պաշտոնական խաղերում չի ընդգրկվել հայտացուցակում։ Միևնույն ժամանակ, Սևիկյանը մասնակցել է ընկերական հանդիպման Մադրիդի «Ռեալի» դեմ։
Սևիկյանի պայմանագիրը «Ֆերենցվարոշի» հետ նախատեսված է մինչև 2028 թվականը։
«Հապոել Պետահ Տիկվան» ներկայացնում է Պետահ Տիկվա քաղաքը։ Նախորդ մրցաշրջանում թիմը Իսրայելի առաջնության բարձրագույն խմբում զբաղեցրել է վեցերորդ տեղը։
Հիշեցնենք, որ նախորդ մրցաշրջանում Իսրայելում հանդես էր գալիս նաև Հայաստանի հավաքականի հարձակվող Արթուր Միրանյանը, որը պաշտպանում էր «Բնեյ Սախնինի» գույները։ Ներկայում Միրանյանն առանց ակումբի է։