Հայաստանի Մ16 հավաքականը դարձավ Եվրոպայի չեմպիոն C դիվիզիոնում

Հայաստանի բասկետբոլի Մ16 հավաքականը նվաճեց 2026 թվականի Եվրոպայի առաջնության C դիվիզիոնի ոսկե մեդալները։ Երևանում անցկացված մրցաշարի եզրափակիչում Հայաստանի հավաքականը վստահ հաղթանակ տարավ Մալթայի նկատմամբ՝ 97։68 հաշվով։

Հանդիպման ամենաարդյունավետ խաղացողը դարձավ Դմիտրի Հաջյանը։ Հայաստանի հավաքականի բասկետբոլիստը վաստակեց 32 միավոր, կատարեց 6 արդյունավետ փոխանցում և գրանցեց 5 անդրադարձ։

Էնթոնի Սարգսյանը ձևակերպեց դաբլ-դաբլ՝ իր հաշվին գրանցելով 18 միավոր և 21 անդրադարձ։ Բացի այդ, նա կատարեց 5 արդյունավետ փոխանցում, 3 խլում և 3 բլոկ-շոթ։

Չեմպիոնների կազմում ևս մեկ դաբլ-դաբլ ձևակերպեց Միխայիլ Պետրովը՝ 22 միավոր և 13 անդրադարձ։ Նա նաև կատարեց 5 արդյունավետ փոխանցում, 3 խլում և 2 բլոկ-շոթ։ Իթան Կազանջյանը վաստակեց 18 միավոր և կատարեց 7 արդյունավետ փոխանցում։

Մրցաշարի արդյունքներով Էնթոնի Սարգսյանն ու Իթան Կազանջյանն ընդգրկվեցին Եվրոպայի Մ16 առաջնության C դիվիզիոնի խորհրդանշական հավաքականում։

Տնային մրցաշարում տարած հաղթանակի շնորհիվ Հայաստանի Մ16 հավաքականը հաջորդ տարի իրավունք ստացավ հանդես գալ Եվրոպայի առաջնության B դիվիզիոնում, որտեղ մասնակցում է 22 թիմ։