FIFA-ի վարկանիշ․ Հայաստանը նահանջել է 108-րդ հորիզոնական

Հայաստանի ֆուտբոլի տղամարդկանց ազգային հավաքականը սեպտեմբեր-հոկտեմբեր ամիսների միջազգային պատուհանի արդյունքներով FIFA-ի վարկանիշում կորցրել է մեկ դիրք և այժմ զբաղեցնում է 108-րդ տեղը։

Այս ժամանակահատվածում Եղիշե Մելիքյանի գլխավորած թիմը չորս հանդիպում է անցկացրել ՈՒԵՖԱ-ի Ազգերի լիգայում՝ տանելով մեկ հաղթանակ, մեկ անգամ խաղալով ոչ-ոքի և կրելով երկու պարտություն։

Հայաստանի հավաքականի արդյունքները․

• Հայաստան — Լատվիա՝ 2:0

• Հայաստան — Չեռնոգորիա՝ 2:3

• Կիպրոս — Հայաստան՝ 2:0

• Չեռնոգորիա — Հայաստան՝ 0:0

Ներկայիս դիրքը ազգային հավաքականի համար վատագույնն է վերջին տասը տարվա ընթացքում։ 2016 թվականի հոկտեմբերին Հայաստանի հավաքականը FIFA-ի վարկանիշում զբաղեցնում էր 125-րդ տեղը։

Ինչու Հայաստանը կորցրեց մեկ դիրք

Սեպտեմբերին և հոկտեմբերին Ազգերի լիգայի հանդիպումներին զուգահեռ անցկացվում էին նաև Աֆրիկայի ազգերի գավաթի որակավորման հանդիպումները։

ԱԱԳ-ի ընտրական հանդիպումների նշանակության գործակիցը FIFA-ի վարկանիշում կազմում է 25, մինչդեռ Ազգերի լիգայի հանդիպումների համար կիրառվում է 15 գործակիցը։ Սա մի շարք աֆրիկյան հավաքականների հնարավորություն տվեց ավելի շատ վարկանիշային միավորներ վաստակել և առաջ անցնել եվրոպական թիմերից։

Հայաստանի մրցակիցների դիրքերը

Հայաստանի հավաքականի խմբային մրցակիցներից լավագույն արդյունքը գրանցել է Չեռնոգորիան։ Երեք հաղթանակից և մեկ ոչ-ոքիից հետո թիմը բարձրացել է մեկ հորիզոնականով և այժմ զբաղեցնում է աշխարհի 79-րդ տեղը։

Կիպրոսը, չնայած միջազգային պատուհանի ընթացքում գրանցած երկու հաղթանակին և մեկ ոչ-ոքիին, կորցրել է մեկ դիրք և այժմ 125-րդն է։

Ամենախոշոր անկումը գրանցել է Լատվիան։ Հավաքականը նահանջել է միանգամից վեց հորիզոնականով և այժմ զբաղեցնում է 143-րդ տեղը։ Սա ութերորդ վատագույն ցուցանիշն է եվրոպական ազգային հավաքականների շրջանում։

FIFA-ի վարկանիշի լավագույն տասնյակը

Առաջին տասնյակում գլխավոր փոփոխությունը Պորտուգալիայի հավաքականի առաջընթացն է՝ միանգամից երկու հորիզոնականով։ Պորտուգալացիները շրջանցել են Բրազիլիային և Մարոկկոյին ու բարձրացել հինգերորդ տեղ։

1. Իսպանիա

2. Արգենտինա

3. Ֆրանսիա

4. Անգլիա

5. Պորտուգալիա

6. Բրազիլիա

7. Մարոկկո

8. Բելգիա

9. Նիդերլանդներ

10. Մեքսիկա