«Փյունիկը» հաղթեց «Արարատին». Տարախչյանը գոլ խփեց երրորդ անընդմեջ խաղում, Աֆյանը՝ առաջին անգամ ակումբի կազմում

«Փյունիկը» հաղթանակ տարավ «Արարատի» նկատմամբ առաջնության 4-րդ տուրի խաղում՝ հանդիպումն ավարտելով 2:0 հաշվով։

Խաղի առանցքային դրվագը տեղի ունեցավ 54-րդ րոպեին, երբ «Արարատի» պաշտպան Վարազդատ Հարոյանը հեռացվեց խաղադաշտից Պիկիսի նկատմամբ խախտման համար։ Նշանակվեց 11-մետրանոց, սակայն կիպրոսցի ֆուտբոլիստը չկարողացավ իրացնել այն։

Թվային առավելությամբ խաղալով՝ «Փյունիկը» կարողացավ կոտրել մրցակցի դիմադրությունը հանդիպման վերջնամասում։ Ընդ որում, երկու գոլերի հեղինակներն էլ փոխարինման դուրս եկած ֆուտբոլիստներն էին։

82-րդ րոպեին հաշիվը բացեց Գևորգ Տարախչյանը։ Նրա համար սա երրորդ անընդմեջ խաղն էր, որում նա գոլի հեղինակ դարձավ։ Հատկանշական է, որ բոլոր երեք հանդիպումներում էլ կիսապաշտպանը գոլ է խփել փոխարինման դուրս գալուց հետո։

Վերջնական հաշիվը ձևակերպեց Վյաչեսլավ Աֆյանը՝ խփելով իր առաջին գոլը «Փյունիկի» կազմում՝ 2:0։

«Փյունիկը» ընթացիկ առաջնությունում անցկացրել է երեք հանդիպում և վաստակել 7 միավոր։ «Արարատը» չորս տուրից հետո ունի 3 միավոր։