Նեյմարը կմեկնի ԱԱ-2026․ Անչելոտին հրապարակել է Բրազիլիայի հավաքականի կազմը

Բրազիլիայի հավաքականի գլխավոր մարզիչ Կառլո Անչելոտին հրապարակել է ազգային թիմի վերջնական հայտացուցակը 2026 թվականի աշխարհի առաջնության համար։ 26 ֆուտբոլիստների թվում է նաև Նեյմարը, որը կրկին հնարավորություն կստանա հանդես գալ մոլորակի գլխավոր ֆուտբոլային մրցաշարում։

Բրազիլիայի հավաքականի կազմի ընդհանուր արժեքը գնահատվում է 908 միլիոն եվրո։ Թիմի ամենաթանկ ֆուտբոլիստը Մադրիդի «Ռեալի» աստղ Վինիսիուս Ժունիորն է, որի տրանսֆերային արժեքը կազմում է 150 միլիոն եվրո։

Բրազիլական թիմի միջին տարիքը 29,2 է։ Այս պահին սա մրցաշարի մասնակիցների շրջանում ամենատարեց հայտացուցակներից մեկն է։ Կազմի ամենատարեց ֆուտբոլիստը դարպասապահ Վևերտոնն է, որը 38 տարեկան է։ Ամենաերիտասարդ խաղացողներն են Ռայանը և Էնդրիկը․ երկուսն էլ 19 տարեկան են։

Հարձակման գծում Անչելոտին հավաքել է աստղային կազմ։ Նեյմարից բացի, հայտացուցակում ընդգրկվել են Վինիսիուս Ժունիորը, Ռաֆինյան, Գաբրիել Մարտինելին, Մատեուս Կունյան, Լուիս Էնրիկեն, Իգոր Տիագոն, Ռայանը և Էնդրիկը։

Միևնույն ժամանակ, հայտացուցակից դուրս են մնացել մի շարք հայտնի ֆուտբոլիստներ։ Աշխարհի առաջնությանը չեն մասնակցի Ռիշարլիսոնը, Իգոր Ժեզուսը, Ժոաո Պեդրոն, Անտոնին, Անդրեյ Սանտոսը և Կառլոս Աուգուստոն։ Մրցաշարը բաց կթողնեն նաև վնասվածք ունեցող Էդեր Միլիտաոն, Էստևաոն, Ռոդրիգոն և Ժոելինտոնը։

Բրազիլիայի հավաքականի ֆուտբոլիստները ազգային թիմին կմիանան մայիսի 26-ին։ Դրանից հետո թիմը մայիսի 31-ին ընկերական հանդիպում կանցկացնի Պանամայի դեմ, իսկ հունիսի 2-ին կմեկնի ԱՄՆ։ Եվս մեկ ստուգողական հանդիպում նախատեսված է հունիսի 6-ին՝ Եգիպտոսի դեմ։

Աշխարհի առաջնությունում Բրազիլիան մեկնարկելու է հունիսի 14-ին՝ Մարոկկոյի դեմ խաղով։ Երկրորդ տուրում Անչելոտիի թիմը հունիսի 20-ին կմրցի Հաիթիի հետ, իսկ խմբային փուլի վերջին խաղը կանցկացնի հունիսի 25-ին՝ Շոտլանդիայի դեմ։

Բրազիլիայի հավաքականի կազմը ԱԱ-2026-ի համար

Դարպասապահներ:
Ալիսոն («Լիվերպուլ»), Էդերսոն («Ֆեներբահչե»), Վևերտոն («Գրեմիո»)։

Պաշտպաններ:
Ալեքս Սանդրո («Ֆլամենգո»), Բրեմեր («Յուվենտուս»), Դանիլո («Ֆլամենգո»), Դուգլաս Սանտոս («Զենիթ»), Գաբրիել Մագալյաես («Արսենալ»), Իբանյես («Ալ-Ահլի»), Լեո Պերեյրա («Ֆլամենգո»), Մարկինյոս («ՊՍԺ»), Ուեսլի («Ռոմա»)։

Կիսապաշտպաններ:
Բրունո Գիմարաես («Նյուքասլ»), Կազեմիրո («Մանչեսթեր Յունայթեդ»), Դանիլո Սանտոս («Բոտաֆոգո»), Ֆաբինյո («Ալ-Իթիհադ»), Լուկաս Պակետա («Ֆլամենգո»)։

Հարձակվողներ:
Էնդրիկ («Լիոն»), Գաբրիել Մարտինելի («Արսենալ»), Իգոր Տիագո («Բրենթֆորդ»), Լուիս Էնրիկե («Զենիթ»), Մատեուս Կունյա («Մանչեսթեր Յունայթեդ»), Նեյմար («Սանթոս»), Ռաֆինյա («Բարսելոնա»), Ռայան («Բորնմութ»), Վինիսիուս Ժունիոր («Ռեալ»)։