Նաիր Տիկնիզյան. «Մեր խմբի ֆավորիտը Չեռնոգորիան է, բայց տանը մեզ հետ դժվար կլինի խաղալ»

Հայաստանի հավաքականի պաշտպան Նաիր Տիկնիզյանը պատասխանել է լրագրողների հարցերին ՈՒԵՖԱ-ի Ազգերի լիգայի 2026/27 մրցաշրջանի երկրորդ տուրում Չեռնոգորիայի դեմ խաղից առաջ։ Հանդիպումը կկայանա սեպտեմբերի 28-ին Երևանում։ Երկու թիմերն էլ մրցաշարը սկսել են հաղթանակով. Հայաստանը հաղթել է Լատվիային (2:0), իսկ Չեռնոգորիան՝ Կիպրոսին (2:1)։

Նաիր Տիկնիզյանի մամուլի ասուլիսը Հայաստան — Չեռնոգորիա խաղից առաջ

— Լատվիայի դեմ խաղում դուք հաջողությամբ համագործակցում էիք Նարեկ Հովհաննիսյանի հետ և հաճախ փոխում էիք դիրքերը։ Ինչպիսի՞ն էր նրա հետ նույն եզրում խաղալը։ Կարծո՞ւմ եք՝ կատարել եք ձեր առաջադրանքը։

— Այն ամենը, ինչ տեսնում եք խաղադաշտում, մենք պատրաստում ենք մարզումների ժամանակ։ Մարզիչը ցուցումներ է տալիս, իսկ մենք դրանք կատարում ենք։ Թե որքանով դա ստացվեց խաղում, ավելի լավ է մարզչին հարցնել։ Բայց եթե հաղթել ենք, կարծում եմ՝ մեր առաջադրանքը կատարել ենք։

— Դուք Բալշա Պոպովիչի հետ խաղում եք «Օլիմպիակոսում»։ Քննարկե՞լ եք առաջիկա հանդիպումը։

— Երբ հավաքականում եմ, չեմ սիրում պատասխանել ակումբին վերաբերող հարցերին։ Ամբողջությամբ կենտրոնացած եմ ազգային թիմի խաղերի վրա։ Վաղը Պոպովիչն իմ մրցակիցն է լինելու։ Նա հիանալի դարպասապահ է, բայց նրա մասին որևէ գաղտնիք բացահայտել չեմ կարող։ Դա մեր մարզիչների և վերլուծաբանների աշխատանքն է։

— Թիմը մրցաշարը սկսել է հաղթանակով։ Այսքան կարճ ժամանակում որքանո՞վ եք հասցրել պատրաստվել հաջորդ խաղին։ Հաղթական տրամադրությունը կօգնի՞։

— Փորձում ենք համեստ մնալ։ Այո, հաղթեցինք առաջին խաղում, բայց առջևում ևս հինգ հանդիպում կա, և ամեն ինչ կարող է փոխվել։ Չեմ կարող ասել, թե ամբողջությամբ վերականգնվել ենք։ Կան ֆուտբոլիստներ, որոնք դեռ լավագույն մարզավիճակում չեն կամ բավարար խաղային պրակտիկա չունեն։ Բայց ամեն ինչ անում ենք լավ խաղալու համար։ Առաջիկա հանդիպումներում առաջնային կլինեն նվիրումը, բնավորությունը և հաղթելու կամքը։ Խաղացանկը շատ ծանր է, նախկինում նման բան չենք ունեցել, բայց կանենք այն ամենը, ինչ կարող ենք։

— Ի՞նչ եք զգում, երբ խաղից առաջ հնչում է Հայաստանի օրհներգը։

— Հարցին հարցով պատասխանեմ. իսկ դո՞ւք ինչ եք զգում։

— Փշաքաղվում եմ։ Կարծում եմ՝ այդ զգացողությունն ավելի է ուժեղանում, երբ տեսնում ես տրիբունաների աջակցությունը։

— Լիովին համաձայն եմ ձեզ հետ։ Ավելացնեմ, որ յուրաքանչյուր ֆուտբոլիստ, կրելով երկրի զինանշանով մարզաշապիկը, մեծ պատասխանատվություն է ստանձնում երկրպագուների և ամբողջ երկրի առաջ։ Մենք բոլորս դա զգում ենք և փորձում ենք այդ հույզերը ճիշտ ուղղությամբ օգտագործել։

— Ե՞րբ եք մեզ ուրախացնելու հայերեն պատասխաններով։

— Խորամանկ հարց է։ Այստեղ ռուսերեն պատասխանելն ինձ համար էլ այնքան հարմար չէ։ Ես ծնվել եմ ռուսախոս ընտանիքում և հայերեն սովորելու հնարավորություն չեմ ունեցել։ Հասկանում եմ, թե դա որքան կարևոր է։ Իմ տարիքում լեզու սովորելը հեշտ չէ, բայց խոստանում եմ հաջորդ մամուլի ասուլիսում մի քանի արտահայտություն ասել հայերեն։

Այդ պահին Հայաստանի հավաքականի գլխավոր մարզիչ Եղիշե Մելիքյանը հավելեց.

— Մենք բոլորս գիտենք ֆուտբոլիստների, որոնք հայերեն են խոսում, բայց հիմա այստեղ չեն և հավաքականում չեն խաղում։ Եկեք շնորհակալություն հայտնենք Նաիրին, որ մեզ հետ է և հայկական սիրտ ունի։ Հայերեն խոսելը միայն ժամանակի հարց է։

— Հայաստանը Լատվիայի հետ արդեն խաղացել է։ Մնացած մրցակիցներից՝ Չեռնոգորիայից և Կիպրոսից, ո՞ւմ եք համարում խմբի ֆավորիտ։

— Կարծում եմ՝ մեր խմբի ֆավորիտը Չեռնոգորիան է։ Նրա կազմում կան առաջատար առաջնություններում հանդես եկող ֆուտբոլիստներ։ Մենք ուսումնասիրել ենք բոլոր մրցակիցներին և գիտենք նրանց ուժեղ ու թույլ կողմերը։ Բայց տանը ցանկացած թիմի համար դժվար կլինի մեզ հետ խաղալ։ Վաղվա հանդիպումն ամեն ինչ ցույց կտա։

— Հավաքականին միացել են նորեկներ Ռուսաստանից։ Օգնո՞ւմ եք նրանց հարմարվել թիմում։

— Իհարկե։ Նրանց օգնում եմ ոչ միայն ես, այլև ամբողջ թիմը։ Մենք շատ համախմբված կոլեկտիվ ունենք, ընդհանուր նպատակ և զրուցելու բազմաթիվ թեմաներ։ Այդ պատճառով նոր ֆուտբոլիստների համար հիմա հեշտ է ներգրավվել թիմում։

— Լատվիայի դեմ Էդուարդ Սպերցյանը նույնպես հաճախ տեղափոխվում էր ձախ եզր և համագործակցում ձեզ հետ։ Ինչպե՞ս եք գնահատում ձեր խաղը։

— Կտեսնենք՝ կհաջողվի՞ դա կրկնել վաղը։

Հայաստանը հանդիպմանը մոտենում է պաշտպանության գծում զգալի կորուստներով։ Լատվիայի դեմ խաղում վնասվածք է ստացել Խուլիո Բուենոն, իսկ մինչ այդ վնասվածքներ էին ստացել Սերգեյ Մուրադյանը, Ստյոպա Մկրտչյանը, Կամո Հովհաննիսյանը և Էդգար Գրիգորյանը։