Միշել Դեր Զաքարյանը երրորդ անգամ կգլխավորի «Նանտը»

Հայաստանի ազգային հավաքականի նախկին պաշտպան Միշել Դեր Զաքարյանը մոտ է «Նանտ» վերադառնալուն։ 63-ամյա մասնագետը մարզչական կարիերայի ընթացքում երրորդ անգամ պետք է գլխավորի ֆրանսիական ակումբը։

Ֆրանսիական մամուլի տեղեկություններով՝ «Նանտի» ղեկավարությունն արդեն առաջադեմ բանակցություններ է վարում Դեր Զաքարյանի հետ։ Սպասվում է, որ հենց նա կդառնա թիմի նոր գլխավոր մարզիչը՝ ակումբի Լիգա 2 դուրս մնալուց հետո։

Դեր Զաքարյանի համար «Նանտը» շատ լավ ծանոթ ակումբ է։ Նախկինում նա արդեն երկու անգամ աշխատել է թիմի հետ՝ 2007/08 մրցաշրջանում, ինչպես նաև 2012-ից 2016 թվականներին։ Հենց նրա գլխավորությամբ «դեղձանիկները» երկու անգամ վերադարձել են Ֆրանսիայի բարձրագույն դիվիզիոն։ 2008 թվականին նա թիմին դուրս բերեց Լիգա 1, իսկ 2013 թվականին կրկնեց այդ հաջողությունը։

Այժմ մասնագետի առջև կրկին նմանատիպ խնդիր է դրվելու՝ որքան հնարավոր է արագ «Նանտին» վերադարձնել ֆրանսիական ֆուտբոլի էլիտա։ Ակումբը ծանր մրցաշրջան անցկացրեց և չկարողացավ խուսափել անկումից, ուստի ղեկավարությունը որոշեց վստահել մարզչի, որը լավ գիտի թիմի ներքին կառուցվածքը և արդեն կարողացել է նրա հետ հասնել անհրաժեշտ արդյունքի։

Դեր Զաքարյանի վերջին ակումբը «Կանն» էր, որտեղ 2025 թվականին նրա աշխատանքը այնքան էլ հաջող չստացվեց։ Սակայն «Նանտում» հույս ունեն, որ փորձն ու ակումբը լավ ճանաչելը կօգնեն նրան կրկին դառնալ այն մարդը, որը կարող է թիմին վերադարձնել նախկին մակարդակին։

Միշել Դեր Զաքարյանը լավ հայտնի է նաև հայ երկրպագուներին։ Նախկինում նա հանդես է եկել Հայաստանի ազգային հավաքականի կազմում և շարունակում է մնալ ֆրանսիական ֆուտբոլում ամենահայտնի հայ մասնագետներից մեկը։