Մանուել Տուլիպան՝ «Ցելյեի» դեմ խաղից հետո. «0:2 հաշիվն անարդար է, մենք արժանի չէինք պարտության»
- Հեղինակ: Vahe Hakobyan
- Sportaran
«Արարատ-Արմենիայի» գլխավոր մարզիչ Մանուել Տուլիպան մեկնաբանել է Չեմպիոնների լիգայի որակավորման երրորդ փուլի պատասխան խաղում սլովենական «Ցելյեից» կրած պարտությունը։
Տանը 2:1 հաշվով հաղթելուց հետո Հայաստանի չեմպիոնը Սլովենիայում պարտվեց 0:2 հաշվով և երկխաղյա դիմակայությունում զիջեց ընդհանուր 2:3 հաշվով։ Ընդ որում՝ մինչև հանդիպման վերջնամասը Տուլիպայի թիմը երկու խաղերի արդյունքում առավելություն ուներ և գոլ խփելու մի քանի լավ հնարավորություն ստեղծեց։
Հետխաղյա մամուլի ասուլիսի ժամանակ Մանուել Տուլիպան գնահատել է իր թիմի խաղը, խոսել մրցավարության մասին, բացատրել Արթուր Սերոբյանի փոխարինման պատճառը և պատմել, թե ինչ է ասել ֆուտբոլիստներին հանդիպումից հետո։
Մանուել Տուլիպայի մամուլի ասուլիսը խաղից հետո
— Մինչև առաջին բաց թողած գոլը «Արարատ-Արմենիան» մի քանի րոպե շարունակ լուրջ ճնշում էր գործադրում մրցակցի վրա և մի քանի գոլային պահ ստեղծեց։ Ի՞նչ փոխվեց դրանից հետո։
— Այս խաղը ցույց տվեց, թե որքան դաժան կարող է լինել ֆուտբոլը։ Բոլոր նրանք, ովքեր դիտել են հանդիպումը, տեսել են, որ մինչև գոլ բաց թողնելը մենք լավ էինք խաղում։ Գոլային պահեր ունեինք, շատ մոտ էինք հաշիվը բացելուն, սակայն մրցակցի դարպասապահը հիանալի գործեց։
Ֆուտբոլում հաճախ այդպես է լինում. երբ չես օգտագործում քո հնարավորությունները, իրավիճակը փոխվում է։ Արդյունքում երկու գոլ բաց թողեցինք։
Բայց ամենակարևորը, ինչ ուզում եմ ասել, այն է, որ իմ ֆուտբոլիստներն այսօր ֆենոմենալ էին։ Նրանք ոչնչից չէին վախենում և համարձակ ֆուտբոլ ցուցադրեցին։ 0:2 հաշիվը չի արտացոլում այն, ինչ տեղի էր ունենում խաղադաշտում։ Իմ կարծիքով՝ նման արդյունքն անարդար է։ Ավելի տրամաբանական կլիներ, եթե դիմակայությունը տեղափոխվեր լրացուցիչ ժամանակ։
— Ի՞նչ կասեք Ուգո Օլիվեյրայի խաղի մասին։ Թվում էր, որ այսօր նա իր լավագույն հանդիպումը չանցկացրեց։
— Հնարավոր է՝ ամեն ինչ սկսվեց նրանից, որ արդեն առաջին խախտումից հետո նա դեղին քարտ ստացավ։ Այս խաղում նա ստիպված էր ավելի շատ պաշտպանվել, ուստի շատ մեծ ծավալի աշխատանք կատարեց։ Չնայած դրան՝ ես դրական եմ գնահատում նրա խաղը։
Նաև ուզում եմ մի քանի խոսք ասել մրցավարության մասին։ Մրցակցի ձախ պաշտպանը երկու ակնհայտ խախտում կատարեց, որոնցից յուրաքանչյուրն, իմ կարծիքով, արժանի էր դեղին քարտի, բայց մրցավարը միայն մեկը ցույց տվեց։ Եվ այս ամենը տեղի էր ունենում 0:0 հաշվի ժամանակ։
Ամեն դեպքում ուզում եմ շնորհավորել «Ցելյեին» հաղթանակի կապակցությամբ։ Դա շատ որակյալ և լավ կազմակերպված թիմ է։
— Արթուր Սերոբյանի փոխարինումը տակտիկական որոշո՞ւմ էր, թե՞ նա հոգնել էր։
— Սերոբյանի համար սա շատ բարդ հանդիպում էր։ Նա իսկապես շատ էր հոգնել, քանի որ սովորականից զգալիորեն ավելի շատ էր ստիպված օգնել թիմին պաշտպանությունում՝ ընդ որում երկու խաղակեսերում էլ։
Բայց նույնիսկ այդ պայմաններում, երբ Արթուրը ստանում էր գնդակը, նա խաղադաշտի ամենավտանգավոր ֆուտբոլիստներից մեկն էր։ Մրցակիցը հաճախ կարողանում էր նրան կանգնեցնել միայն կանոնների խախտման միջոցով։
Այն պահին, երբ որոշեցի փոխարինել նրան, մեզ անհրաժեշտ էր թարմություն հաղորդել եզրերում խաղին։ Սերոբյանի հեռանալուց հետո նույնպես վտանգավոր պահեր ունեցանք, բայց վերջում ամեն ինչ դասավորվեց այնպես, ինչպես դասավորվեց։
— Ի՞նչ կասեք Ալեքսանդրոս Մալիսի խաղի մասին։ Համաձա՞յն եք, որ այսօր նա «Արարատ-Արմենիայի» առաջատարներից մեկն էր և հիանալի հանդիպում անցկացրեց՝ չնայած երկու բաց թողած գոլերին։
— Միայն Մալիսը չէ, որ հիանալի հանդիպում անցկացրեց։ Մեր մի քանի ֆուտբոլիստներ այսօր, հնարավոր է, ցուցադրեցին իրենց լավագույն խաղերից մեկը։
Եվ հենց դա է ինձ ավելի շատ տխրեցնում. մենք այդքան լավ խաղացինք, բայց վերջում պարտվեցինք։ Կարծում եմ՝ մենք արժանի չէինք այս պարտությանը։
— Ի՞նչ ասացիք ֆուտբոլիստներին խաղից հետո։
— Ես նրանց ասացի, որ հպարտ եմ, որ աշխատում եմ նրանց հետ, որովհետև այսօր նրանք արեցին հենց այն, ինչ ես ուզում էի նրանցից։ Նրանք ցույց տվեցին, որ խաղադաշտ էին դուրս եկել հաղթելու համար։
Սովորաբար նման մեծ հանդիպումներում պարտություններից հետո թիմին շատ ժամանակ է անհրաժեշտ էմոցիոնալ առումով վերականգնվելու համար։ Բայց ես ֆուտբոլիստներին բացատրեցի, որ «Վանի» դեմ խաղից առաջ մենք պետք է հնարավորինս արագ վերականգնվենք։
Յուրաքանչյուր հանդիպում պետք է ընկալել որպես մեր զարգացման կարևոր փուլ և ավելի լավը դառնալու հնարավորություն։ Ես ուզում եմ, որ այն ֆուտբոլիստները, որոնք այժմ մեր թիմում են, հնարավորինս երկար մնան «Արարատ-Արմենիայում»։
Չեմպիոնների լիգայից դուրս մնալուց հետո «Արարատ-Արմենիան» եվրագավաթային մրցաշրջանը կշարունակի Եվրոպայի լիգայի որակավորման փուլում։