Կառլեն Հովհաննիսյանն առաջին անգամ ընդգրկվել է «Ակրոնի» մեկնարկային կազմում ՌՊԼ-ում

Հայաստանի ազգային հավաքականի 21-ամյա կիսապաշտպան Կառլեն Հովհաննիսյանն առաջին անգամ ընդգրկվել է Տոլյատիի «Ակրոնի» մեկնարկային կազմում Ռուսաստանի Պրեմիեր լիգայում։ Դա տեղի է ունեցել 10-րդ տուրի՝ «Ռոստովի» դեմ խաղում, որն ավարտվել է նրա թիմի՝ 0։1 հաշվով պարտությամբ։

Հովհաննիսյանը խաղադաշտում անցկացրել է 63 րոպե, որից հետո փոխարինվել է։ Հայ ֆուտբոլիստը դեղին քարտ է ստացել, սակայն միևնույն ժամանակ վստահ խաղ է ցուցադրել պաշտպանական գործողություններում։

SofaScore-ի տվյալներով՝ Կառլենը ստացել է 6,7 գնահատական։ Նրա հաշվին գրանցվել է երեք հաջող խլում, երեք հաղթած մենապայքար և գնդակի չորս վերադարձ։

21-ամյա կիսապաշտպանի համար սա չորրորդ հանդիպումն էր Ռուսաստանի Պրեմիեր լիգայի ընթացիկ մրցաշրջանում։ Հատկանշական է, որ նախորդ խաղում Հովհաննիսյանը խփել էր իր առաջին գոլը Ռուսաստանի առաջնությունում, իսկ այժմ առաջին անգամ հնարավորություն է ստացել խաղադաշտ դուրս գալ մեկնարկային րոպեներից։

Հիշեցնենք, որ մինչև ակումբ վերադառնալը Կառլեն Հովհաննիսյանը մասնակցել էր Հայաստանի ազգային հավաքականի երեք հանդիպման՝ ՈՒԵՖԱ-ի Ազգերի լիգայի շրջանակում։