Խարիտոն Այվազյանն առաջին անգամ հրավիրվել է Հայաստանի ազգային հավաքական
- Հեղինակ: Vahe Hakobyan
- Sportaran
«Ուրարտուի» պաշտպան Խարիտոն Այվազյանը հրավիրվել է Հայաստանի ազգային հավաքական՝ Ազգերի լիգայի առաջիկա հանդիպումներին մասնակցելու համար։
23-ամյա ֆուտբոլիստը հայտացուցակում կփոխարինի «Արարատ-Արմենիայի» պաշտպան Էդգար Գրիգորյանին, ով անսպասելի վնասվածք է ստացել և չի կարողանա օգնել ազգային թիմին։
Այվազյանի համար սա առաջին հրավերն է Հայաստանի մեծահասակների հավաքական։ Նախկինում նա հանդես է եկել երկրի երիտասարդական հավաքականում, որի կազմում անցկացրել է 7 հանդիպում։
«Ուրարտուի» ֆուտբոլիստը կարող է խաղալ պաշտպանության երկու եզրերում էլ, թեև նրա հիմնական դիրքը աջ պաշտպանն է։
Գրիգորյանի վնասվածքից հետո Հայաստանի հավաքականի հայտացուցակում մնացել է ընդամենը մեկ անվանական ձախ պաշտպան՝ Նաիր Տիկնիզյանը։
Միևնույն ժամանակ կադրային խնդիրներ կան նաև հակառակ եզրում։ Հավաքականի հիմնական աջ պաշտպան Կամո Հովհաննիսյանը նույնպես վնասվածքի պատճառով բաց կթողնի առաջիկա հանդիպումները։ Այդ դիրքում մարզչական շտաբի տրամադրության տակ են Դավիթ Տերտերյանն ու Արտեմ Բանդիկյանը, իսկ այժմ լրացուցիչ տարբերակ կլինի նաև Այվազյանը։
Այսպիսով, Ազգերի լիգայի հանդիպումների մեկնարկից առաջ Հայաստանի հավաքականի մարզչական շտաբը ֆուտբոլիստների վնասվածքների պատճառով կրկին ստիպված է եղել փոփոխություններ կատարել հայտացուցակում։