Կարիերայի գլխավոր շանսը․ Էդմեն Շահբազյանն այսօր կռվելու է UFC-ի թոփ-4 մարտիկի հետ
- Հեղինակ: Vahe Hakobyan
- Sportaran
UFC-ի հայ մարտիկ Էդմեն Շահբազյանն այսօր կանցկացնի իր կարիերայի ամենակարևոր մենամարտերից մեկը։ Միջին քաշային կարգում նա կհանդիպի Բրենդան Ալենի հետ, որը դիվիզիոնի վարկանիշում զբաղեցնում է 4-րդ տեղը։
Շահբազյանի համար այս մենամարտը կարող է իսկական շրջադարձային պահ դառնալ։ Ժամանակին նա համարվում էր UFC-ի ամենավառ հեռանկարային մարտիկներից մեկը․ դեբյուտը կազմակերպությունում նշել էր դեռ երիտասարդ տարիքում, արագ մեծ ճանաչում ձեռք բերել և աչքի ընկել տպավորիչ վաղաժամկետ հաղթանակներով։ Սակայն հետո նրա կարիերայում սկսվեց ծանր շրջան՝ պարտություններ, սպասումների ճնշում և քննադատների կասկածներ։
Այժմ Էդմենը կրկին լավ ընթացք է հավաքել։ Նա երեք անընդմեջ հաղթանակի շարք ունի և վստահ է, որ դարձել է ավելի հասուն ու վտանգավոր մարտիկ։ Ինքը՝ Շահբազյանը, խոստովանում է, որ UFC-ում կրած անհաջողությունները օգնել են իրեն աճել, իսկ հայր դառնալը զգալիորեն փոխել է իր վերաբերմունքը կյանքի և կարիերայի նկատմամբ։
«Նման հնարավորություններ հաճախ չեն լինում։ Այս մենամարտում հաղթանակը կարող է մեծ հայտարարություն դառնալ իմ կարիերայի համար», — նշել է Շահբազյանը։
Էդմենի մրցակիցը շատ լուրջ է։ Բրենդան Ալենը միջին քաշային կարգի ուժեղագույն մարտիկներից մեկն է, որը վերջերս հաղթել է Ռեյնիեր դե Ռիդերին։ Շահբազյանի համար նման մրցակցի նկատմամբ հաղթանակը կարող է կտրուկ բարձրացնել նրան վարկանիշում և ճանապարհ բացել ավելի մեծ մենամարտերի համար։
Հայ մարտիկը մենամարտին պատրաստվել է Xtreme Couture մարզասրահում, որտեղ աշխատել է ուժեղ գործընկերների և մարզիչների հետ։ Էդմենի խոսքով՝ նա լիովին պատրաստ է այս մարտահրավերին։
Շահբազյան — Ալեն մենամարտը կկայանա այսօր՝ շաբաթից կիրակի գիշերը, Լաս Վեգասում՝ UFC Fight Night մրցաշարի շրջանակում։
Այսօր հայտնի դարձավ նաև, որ Էդմենի եղբայրը՝ Լեոն Շահբազյանը, պայմանագիր է ստորագրել UFC-ի հետ։