Ղարիբյանն ու Հարությունյանը պատմել են Հայաստանի հավաքականի կազմում իրենց առաջին գոլերի մասին

Գեորգի Հարությունյանն ու Արթուր Ղարիբյանը, որոնք գոլեր խփեցին Լատվիայի նկատմամբ Հայաստանի հավաքականի հաղթական խաղում (2:0), իրենց տպավորություններով կիսվել են Հայաստանի ֆուտբոլի ֆեդերացիայի պաշտոնական ալիքի հետ։ Երկու ֆուտբոլիստների համար էլ դրանք առաջին գոլերն էին ազգային հավաքականի կազմում։

Ղարիբյանը գոլի հեղինակ դարձավ հավաքականում իր նորամուտի խաղում։ Հանդիպումից առաջ նա ասել էր, որ ցանկանում է գոլ խփել Լատվիային, իսկ եզրափակիչ սուլիչից հետո պատմել է, թե որքան կարևոր էր այդ պահն իր համար։

«Պարզ է, որ իմ ասածները միշտ չէ, որ կարող են իրականություն դառնալ, բայց ես իսկապես շատ էի ուզում գոլ խփել և խփեցի։ Շատ ուրախ եմ։ Գոլը նվիրեցի կնոջս, հայրիկիս և տատիկիս․ նրանք խաղը դիտում էին տրիբունաներից։ Այնտեղ էին նաև իմ մի քանի ընկերները։ Այս գոլը նվիրում եմ նրանց բոլորին»։

Հարձակվողը նշել է, որ երկրորդ գոլը թիմին օգնեց ավելի հանգիստ անցկացնել հանդիպման ավարտը։

«1:0 հաշիվը շատ վտանգավոր էր, ուստի կարևոր էր երկրորդ գոլը խփել։ 2:0-ի դեպքում արդեն ավելի հեշտ դարձավ։ Լատվիան շատ վտանգավոր էր օդային պայքարում, բայց մեր պաշտպանները լավ խաղացին և գլուխ հանեցին»։

Հարությունյանը, որի գոլը հաղթական դարձավ, այն նվիրել է մարզադաշտ եկած երկրպագուներին։ Պաշտպանը նաև պատմել է, թե իր կարծիքով ինչպես փոխվեց խաղի ընթացքն առաջին գոլից հետո։

«Այդ զգացմունքները բառերով նկարագրել հնարավոր չէ։ Շատ ուրախ եմ, որ գոլ խփեցի։ Այն նվիրում եմ բոլոր նրանց, ովքեր եկել էին մարզադաշտ։ Խաղը շատ բարդ էր․ մրցակիցը պաշտպանվում էր ցածր բլոկով։ Բայց մենք լիովին գերիշխում էինք խաղադաշտում, Լատվիան քիչ պահեր ունեցավ, իսկ մենք հաճախ էինք սպառնում նրանց դարպասին։ Իմ գոլից հետո ավելի հեշտ դարձավ․ մրցակիցը սկսեց ավելի հաճախ գրոհել և բաց տարածություններ թողնել»։

Հայաստանը սեպտեմբերի 25-ին Երևանում հաղթեց Լատվիային ՈՒԵՖԱ-ի Ազգերի լիգայի 2026/27 մրցաշրջանի առաջին տուրում։ Հաջորդ հանդիպումը թիմը կանցկացնի սեպտեմբերի 28-ին՝ տանը ընդունելով Չեռնոգորիային։