Համլետ Մանուկյանը հաղթեց Փարիզի աշխարհի մարտահրավերի գավաթի փուլում, Արթուր Ավետիսյանը նվաճեց արծաթ

Հայաստանի մարմնամարզիկները երկու մեդալ նվաճեցին Փարիզում անցկացված աշխարհի մարտահրավերի գավաթի փուլում։ 18-ամյա Համլետ Մանուկյանը հաղթեց նժույգթափի վարժությունում, իսկ Արթուր Ավետիսյանը երկրորդ տեղը զբաղեցրեց օղակների եզրափակչում։

Մանուկյանի ելույթը գնահատվեց 15,200 միավոր։ Արծաթե մեդալը նվաճեց իտալացի Գաբրիելե Տարգետտան (15,000), իսկ բրոնզը՝ ամերիկացի Բրենդոն Դանգը (14,700)։

Օգոստոսին կայացած Եվրոպայի առաջնության եզրափակչում Մանուկյանը զիջել էր Տարգետտային․ հայ մարմնամարզիկը 15,000 միավորով նվաճել էր արծաթը, իսկ իտալացին հաղթել էր 15,133 միավորով։ Փարիզում Մանուկյանը շրջանցեց մրցակցին և ավելի բարձր գնահատական ստացավ, քան Տարգետտայի՝ Եվրոպայի առաջնությունում հաղթանակ ապահոված արդյունքն էր։

Օղակների եզրափակչում Եվրոպայի գործող չեմպիոն Արթուր Ավետիսյանը վաստակեց 14,533 միավոր։ Նա հաղթող Իլյա Զայկային զիջեց ընդամենը 0,033 միավորով։ Երրորդ տեղը զբաղեցրեց Ադրբեջանը ներկայացնող Նիկիտա Սիմոնովը (14,133)։