«Նոան» ներկայացրել է Noah Park նախագիծը՝ ապագայի սպորտային քաղաք Վաղարշապատում

«Նոա» ֆուտբոլային ակումբը ներկայացրել է Noah Park նախագծի լայնածավալ ճարտարապետական և ինժեներական կոնցեպտը, որը նախատեսվում է իրականացնել Վաղարշապատում։ Նոր նախագիծը պետք է դառնա ակումբի ենթակառուցվածքային զարգացման հաջորդ փուլը և հայկական ֆուտբոլի ամենահավակնոտ մարզական համալիրներից մեկը։

Noah Park-ի կոնցեպտը միավորում է մարզական, կրթական, ենթակառուցվածքային և հանրային տարածքներ։ Նախագծի նպատակն է ստեղծել ժամանակակից ֆուտբոլային էկոհամակարգ, որտեղ կլինեն պայմաններ պրոֆեսիոնալ ֆուտբոլիստների պատրաստման, ակումբային ակադեմիայի զարգացման, մարզչական շտաբի աշխատանքի և տարբեր մարզական միջոցառումների անցկացման համար։

Նախագծի մասին խոսել է «Նոա» ՖԱ նախագահ Վարդգես Վարդանյանը։

«Noah Park-ը մեծ նախագիծ է, որի ստեղծման համար մենք ընտրել ենք իտալական ճարտարապետական ընկերություն։ Այն ցույց է տալիս, թե ուր է զարգանալու այս միջավայրը արդեն առաջիկա մի քանի տարիներին», — նշել է Վարդանյանը։

Noah Park-ի շնորհանդեսը դարձավ ակումբի լայնածավալ ենթակառուցվածքային աշխատանքի շարունակությունը։ Ավելի վաղ՝ մայիսի 18-ին, Էջմիածնում տեղի էր ունեցել «Նոա» ՖԱ-ի նոր մարզաբազայի բացման հանդիսավոր արարողությունը։ Միջոցառմանը ներկա էին Հայաստանի Հանրապետության կառավարության ներկայացուցիչներ, ֆուտբոլային հանրության անդամներ, ԶԼՄ-ներ, ակումբի գործընկերներ, «Նոա»-ի նախագահ Վարդգես Վարդանյանը, ինչպես նաև համաշխարհային ֆուտբոլի լեգենդ Լուիշ Ֆիգուն։

Նոր մարզաբազան արդեն կարևոր քայլ է դարձել ակումբի զարգացման ճանապարհին։ Բազայի տարածքում կառուցվել է ժամանակակից մասնաշենք առաջին թիմի, մարզչական և վարչական անձնակազմի համար։ Այն ներառում է ժամանակակից հանդերձարաններ, վերականգնողական սենյակներ, բժշկական և մերսման սենյակներ, մարզասրահ, հյուրանոցային համարներ, գրադարան, ճաշարան, խորհրդակցությունների սրահներ, աշխատանքային սենյակներ և հանգստի գոտիներ։

Այժմ «Նոան» ներկայացրել է ապագայի ավելի լայն տեսլականը՝ Noah Park-ը, որը պետք է ակումբային ենթակառուցվածքները բարձրացնի նոր մակարդակի։ Սպասվում է, որ նախագիծը կդառնա ոչ միայն ֆուտբոլային կենտրոն, այլև լիարժեք սպորտային քաղաք, որը կարող է կարևոր դեր խաղալ հայկական սպորտի զարգացման գործում։

«Նոա» ՖԱ-ի համար սա ևս մեկ քայլ է եվրոպական մակարդակի ակումբ ձևավորելու ուղղությամբ՝ ժամանակակից բազայով, հզոր ենթակառուցվածքներով և երկարաժամկետ զարգացման ռազմավարությամբ։