Եղիշե Մելիքյան. «Ես կախարդական փայտիկ չունեմ, բայց հավատում եմ Հայաստանի այս հավաքականին»

Հայաստանի ազգային հավաքականի գլխավոր մարզիչ Եղիշե Մելիքյանը մամուլի ասուլիս է անցկացրել Ղազախստանի դեմ ընկերական խաղից առաջ, որը տեղի կունենա հունիսի 6-ին Երևանում՝ Վազգեն Սարգսյանի անվան «Հանրապետական» մարզադաշտում։

Ազգային թիմի գլխավոր մարզիչը խոսել է կադրային խնդիրների, ակումբային մրցաշրջանի ավարտից հետո ֆուտբոլիստների վիճակի, նորեկների դերի, Գրանտ-Լեոն Ռանոսի և Էդգար Սևիկյանի շուրջ ստեղծված իրավիճակի մասին, ինչպես նաև բացատրել է, թե ինչու է այս պահին հավաքականի համար կարևոր ոչ միայն արդյունքը, այլև հասկանալը, թե ինչ վիճակում թիմը կմոտենա աշնանը կայանալիք Ազգերի լիգայի հանդիպումներին։

Մելիքյանն ընդգծել է, որ Հայաստանի հավաքականը վերակառուցման և սերնդափոխության գործընթացում է, ուստի թիմին ժամանակ է անհրաժեշտ։ Նրա խոսքով՝ չնայած բոլոր դժվարություններին, ինքը հավատում է ընտրված ճանապարհին և վստահ է, որ համբերության դեպքում այս թիմը կարող է հասնել շոշափելի արդյունքների։

Եղիշե Մելիքյանի մամուլի ասուլիսը

— Ի՞նչի վրա պետք է ուշադրություն դարձնի Հայաստանի հավաքականը այս ընկերական խաղերում՝ պաշտոնական հանդիպումներին պատրաստվելու համար։

— Այո, մենք ունենք տեսլական, թե ինչ ենք ուզում տեսնել այս ստուգողական հանդիպումներում։ Առաջին հերթին թիմում մեծ փոփոխություններ ունենք, կան վնասվածք ունեցող ֆուտբոլիստներ։ Կան նաև նոր ֆուտբոլիստներ, և սա լավ առիթ է ամեն ինչ վերլուծելու համար։ Աստված տա՝ հաղթենք, իսկ հակառակ դեպքում դա մեզ տեղեկատվություն կտա, թե պաշտոնական խաղերից առաջ ինչի վրա դեռ պետք է աշխատենք։ Կատարվում է կառուցողական աշխատանք, և մենք պետք է լավ անցկացնենք այս երկու հանդիպումները։

— Հավաքականում շատ ֆուտբոլիստներ կան, որոնք ակումբներում խաղային պրակտիկա չունեն։ Նրանք հիմա պատրա՞ստ են խաղալ։

— Գլխավոր խնդիրն այն է, որ Ղազախստանում առաջնությունը դեռ շարունակվում է, և նրանք ավելի լավ մարզավիճակում կլինեն, քան մենք։ Մենք հանգստից հետո ենք։ Բացի այդ, ունենք 5-6 վնասվածք ունեցող ֆուտբոլիստ։ Ամեն դեպքում կան խնդիրներ, բայց մենք լավ ենք պատրաստվել։ Այս խաղերում արդյունքը, իհարկե, կարևոր է, բայց դա ամենակարևորը չէ։ Ես առաջին հերթին ուզում եմ հասկանալ, թե աշնանը մենք ինչ վիճակում կլինենք։ Ընկերական խաղերի արդյունքը չպետք է մեզ շեղի մեր ընտրած ուղուց։

— Ի՞նչ կասեք վաղվա մրցակցի մասին և ինչո՞ւ ընտրեցիք Ղազախստանի հետ ընկերական հանդիպումը։

— Ղազախստանն այժմ ավելի ուժեղ թիմ է, քան այն ժամանակ, երբ մենք նախկինում խաղում էինք նրանց դեմ, մասնավորապես՝ երբ ես էի խաղում նրանց դեմ։ Մեզ պետք էր մրցակից, որը նման կլիներ այն թիմերին, որոնց դեմ աշնանը խաղալու ենք Ազգերի լիգայում։ Նրանք նման են մեր խմբի մյուս թիմերին։ Այս թիմը մեզ խնդիրներ կստեղծի, որոնց մենք պետք է կարողանանք դիմակայել։

— ՈՒԵՖԱ-ն փոխում է Ազգերի լիգայի համակարգը։ Ի՞նչ կասեք դրա մասին։

— Անկեղծ ասած՝ դեռ խորությամբ չեմ ուսումնասիրել դա։ Ես թիմի ներսում այլ խնդիրներ ունեի, որոնք մշտական աշխատանք են պահանջում։ Ինչպես առաջարկեն, այդպես էլ կխաղանք։

— Արտեմ Բանդիկյանը հայտացուցակում նշված է որպես պաշտպան, բայց նույնիսկ Արմեն Գյուլբուդաղյանցն էր ասում, որ նրա համար ավելի հեշտ է խաղալ կիսապաշտպանությունում։ Ո՞ր դիրքում եք նրան դիտարկում։

— Նա ավելի շատ պաշտպանական բնույթի ֆուտբոլիստ է։ Կարող է խաղալ և՛ հենակետային կիսապաշտպանի, և՛ լատերալի դիրքում։ Երկու դիրքն էլ պաշտպանական ուղղվածություն ունեն։ Մենք նրան տեսնում ենք երկու դիրքերում էլ։

— Կա՞ն այլ ֆուտբոլիստներ, որոնց կցանկանայիք տեսնել հավաքականում։

— Մենք ֆուտբոլիստների մեծ ռեսուրս չունենք։ Ինչ ունենք, դրանից էլ հավաքում ենք։ Չեմ կարծում, թե ինչ-որ մեկին բաց ենք թողել կամ հրավիրել ենք, բայց չեն եկել։ Բոլորը, ովքեր հիմա հավաքականում են, սա այն ամենն է, ինչ ունենք։ Շարունակում ենք աշխատել նրանց հետ։

— Ի՞նչ կասեք Էդգար Սևիկյանի մակարդակի մասին։ Նա պատրա՞ստ է մեկնարկային կազմում խաղալ։

— Սևիկյանին հավաքական հրավիրելու վերաբերյալ քննարկումներ եղել են թիմում։ Այն ժամանակահատվածում, ինչ աշխատում եմ հավաքականում, նկատել եմ, որ կան դիրքեր, որտեղ որակի պակաս կա։ Մենք լավ գիտենք, որ Սևիկյանը որակներ և բարձր մակարդակ ունի։ Նա այն տարիքում է, որ կարող է երկար տարիներ օգնել մեզ։ Այո, հիմա նա լավագույն մարզավիճակում չէ, բայց մեծ ներուժ ունի, և նա մեզ պետք է ապագայում։ Նա լավ ֆուտբոլիստ է, մենք պետք է օգնենք նրան։ Մենք նայում ենք ապագային։

— Մենք հաճախ ասում ենք, որ հավաքականում ստիպված ենք ֆուտբոլիստներին օգտագործել ոչ իրենց դիրքերում։ Հիմա թիմում կան կենտրոնական կիսապաշտպաններ Կառլեն Հովհաննիսյանն ու Արամ Խամոյանը։ Սա կօգնի՞ Սպերցյանին տեղափոխել հարձակմանը մոտ դիրք և ազատել նրան բոքս-թու-բոքս դիրքում խաղալուց։

— Առայժմ փորձելու ենք։ Հիմա մենք հավաքական ենք հրավիրել լավագույններին և կփորձենք տարբեր տարբերակներ՝ լավագույն լուծումը գտնելու համար։ Դուք նշեցիք հավաքականի նորեկների անունները, բայց դեռ շուտ է այդքան արմատական փոփոխություններ անել։ Պետք է աստիճանաբար հասկանալ, թե ինչպես է լավագույնը նրանց օգտագործել, հասկանալ, թե ով իսկապես կարող է մեզ օգնել։ Մենք խոսում ենք ֆուտբոլիստների մասին, որոնք առայժմ խաղում են Հայաստանի առաջնությունում, իսկ դա այն լիգան չէ, որտեղից կարելի է անմիջապես հասկանալ, թե ֆուտբոլիստն ինչի է ունակ հավաքականում։ Հայաստանի առաջնությունում խաղալը ցուցանիշ չէ։ Արդեն այստեղ՝ հավաքականում, մենք կկարողանանք հասկանալ՝ կարող են նրանք խաղալ անհրաժեշտ մակարդակով, թե ոչ։ Դա ժամանակ է պահանջում։

— Դուք առանձին խոսե՞լ եք «Ալաշկերտի» գլխավոր մարզիչ Վահե Գևորգյանի հետ, որը դժգոհում էր իր թիմի ֆուտբոլիստների՝ հավաքականում չլինելուց։

— Վահե Գևորգյանի հետ առանձնահատուկ ոչինչ չի եղել, մեր միջև ոչինչ չի պատահել։ Այն, ինչ նա ասել է հարցազրույցում, նրա տեսլականն է, ես չեմ իջնի այդ մակարդակին։ Ես մեծ ճանապարհ եմ անցել և գիտեմ, թե որտեղ եմ գտնվում և ինչ խնդիրներ ունեմ։ Ես զբաղվում եմ իմ աշխատանքով։

— Դուք ասում էիք, որ ձեր նպատակն է բարձրացնել հավաքականի մակարդակը։ Ի՞նչ աշխատանք է տարվում այդ ուղղությամբ։

— Ես ընդունել եմ խնդիրներ ունեցող թիմ, վերցրել եմ այդ պատասխանատվությունը։ Չեմ կարող խոստանալ, որ ամեն ինչ լավ կլինի, ես կախարդական փայտիկ չունեմ, և պետք չէ ինձանից շատ բան սպասել, բայց վստահ եմ, որ մենք ճիշտ ճանապարհի վրա ենք և առաջ ենք շարժվում՝ լուծելով խնդիրները։ Մենք երիտասարդ թիմ ունենք, այդ պատճառով չեմ ուզում բարձրագոչ հայտարարություններ անել։ Բայց ես հավատում եմ այս թիմին, ընթանում է սերնդափոխություն։ Այս ամենը ժամանակ է պահանջում։ Ես չեմ հուսահատվի, եթե այս տարի մեզ մոտ ոչինչ չստացվի։ Համբերություն ունեցեք, և վաղ թե ուշ այս թիմը կդառնա լավ թիմ, որը կհասնի շոշափելի արդյունքների։ Եթե համբերություն ցուցաբերեք, ես թիմը կտանեմ առաջ, իսկ եթե ոչ, ապա կգա մեկ այլ մարզիչ և նա կտանի այն։

— Ավելի վաղ դուք խորհուրդ էիք տվել Գրանտ-Լեոն Ռանոսին փոխել թիմը։ Նա փոխեց և տեղափոխվեց «Այնտրախտ Բրաունշվայգ», բայց այնտեղ էլ իրեն չգտավ։ Ի՞նչ եք մտածում այս թիմի մասին, թե՞ նրան դեռ պետք է տեղափոխվել ավելի համապատասխան թիմ։

— Այո, նա կայունություն չունի, այս տարի գոլեր չի խփել։ Նրա մոտ ես ավելի շատ հետընթաց եմ տեսնում, քան առաջընթաց։ Մենք փորձում ենք օգնել նրան վերադառնալ անհրաժեշտ մակարդակին։ Հնարավոր է՝ ես չկարողանամ երկար սպասել, մեզ մոտ պետք է մրցակցություն լինի։ Ինչով կարողանում եմ, օգնում եմ նրան, բայց նա պետք է մտածի իր առաջընթացի և իր խաղի մասին։

— Բելառուսի դեմ խաղում Արթուր Սերոբյանը մտավ խաղադաշտ և զգալիորեն ուժեղացրեց խաղը։ Կարո՞ղ ենք նրան սպասել մեկնարկային կազմում և նրանով փոխարինել Ռանոսին։

— Այո, իհարկե, կարող ենք։ Բայց գիտեք՝ ինչ կա․ Ռանոսը որակյալ ֆուտբոլիստ է, նա անհաջող ժամանակահատված է անցկացնում, և մենք պետք է օգնենք նրան այդ հարցում ու խաղալու հնարավորություն տանք։ Ռանոսին և Սերոբյանին մենք կտեսնենք խաղադաշտում այս հանդիպումներում։

— Ի՞նչ եք մտածում Ղազախստանի հավաքականի և Դաստան Սատպաևի մասին։ Շուտով նա կմեկնի «Չելսի»։ Ձեր կարծիքով՝ Սատպաևը կարո՞ղ է կրկնել այն հայ ֆուտբոլիստների ճանապարհը, որոնք արդեն իրենց մասին հայտարարել են Եվրոպայում։

— Դուք լավ հավաքական ունեք, մենք լավ ուսումնասիրել ենք այն։ Ղազախստանը վերելքի մեջ է, դուք շատ լավ արդյունքներ ունեք։ Մենք նույնպես լավ ենք պատրաստվել և կփորձենք նաև ձեզ շատ խնդիրներ ստեղծել։ Կտեսնենք՝ ում մոտ ավելի լավ կստացվի։ Դուք միայն Սատպաևը չունեք․ Ղազախստանն ունի ֆուտբոլիստների լավ ընտրություն թե՛ անհատական, թե՛ թիմային առումով։

— Երբ 9 ամիս առաջ գլխավորեցիք թիմը, ի՞նչ էիք պատկերացնում տեսնել թիմում և ի՞նչ ունենք հիմա։ Սա համապատասխանո՞ւմ է ձեր տեսլականին։

— Ես գիտեի, որ գնում եմ մեծ խնդիրներ ունեցող թիմ, դրա համար էլ ինձ հրավիրել էին։ Բայց երբ եկա, ավելի շատ խնդիրներ տեսա։ Ես չեմ վախենում խնդիրներից և ստանձնում եմ դրանց լուծումն ու պատասխանատվությունը։ Ինձ ոգեշնչում է իմ ֆուտբոլիստների աշխատանքը, նրանց ցանկությունը։ Միասին մենք առաջ ենք շարժվում և կարող ենք լուծել բոլոր խնդիրները։ Այս երկու հանդիպումները ցույց կտան, թե ինչի ենք հասել այս պահին։