Էդմեն Շահբազյանը պարտվեց Բրենդան Ալենին UFC Vegas 118-ում
- Հեղինակ: Vahe Hakobyan
- Sportaran
UFC-ի հայ մարտիկ Էդմեն Շահբազյանը պարտություն կրեց UFC Vegas 118 մրցաշարում։ Միջին քաշային կարգի մենամարտում նա միաձայն որոշմամբ զիջեց Բրենդան Ալենին՝ 27-30, 27-30, 28-29։
Մենամարտը տևեց բոլոր երեք ռաունդները և գրեթե ամբողջությամբ անցավ կանգնած դիրքում։ Ալենը գործում էր մի փոքր ավելի արագ, ավելի դիպուկ և կայուն՝ հաստատելով UFC-ի միջին քաշային կարգի թոփ-5-ի մարտիկի իր կարգավիճակը։ Շահբազյանը փորձում էր պատասխանել և որոշ պահերի գտնում էր իր հնարավորությունները, սակայն մրցակիցը մեծ մասի դրվագներում մի փոքր ավելի լավն էր։
Վիճակագրության համաձայն՝ մարտիկները գրեթե հավասար քանակությամբ նշանակալի հարվածներ են հասցրել՝ 88-ը 84-ի դիմաց՝ Ալենի օգտին։ Ամերիկացու առավելությունը նվազագույն էր, սակայն բավական նկատելի՝ մրցավարների համար։ Ամենամոտը երկրորդ ռաունդն էր․ մրցավարներից մեկը այն տվել էր Շահբազյանին։
Էդմենի համար այս պարտությունը հատկապես ցավալի էր, քանի որ այն ընդհատեց նրա երեք անընդմեջ հաղթանակների շարքը։ Ալենի հետ մենամարտից առաջ հայ միջինքաշայինը կրկին լավ ընթացք էր հավաքել և հնարավորություն ստացել կտրուկ մոտենալ UFC-ի վարկանիշային աղյուսակի վերին հատվածին, սակայն թոփ-5-ի մրցակցին հաղթահարել չհաջողվեց։
Հաղթանակից հետո Բրենդան Ալենը հայտարարեց, որ ցանկանում է մենամարտել UFC-ի չեմպիոն Շոն Ստրիքլենդի հետ։
«Ցանկանում եմ հանդիպել Շոն Ստրիքլենդի հետ։ Ես հաղթեցի նրա տղային, հիմա նրա հերթն է», — մենամարտից հետո ասաց Ալենը՝ նկատի ունենալով Շահբազյանին, որը մարզվում է Շոնի հետ։
