Էդիկ Մարտիրոսյանը՝ պատանիների ՄՄԱ-ի աշխարհի առաջնության բրոնզե մեդալակիր

Հայ մարզիկ Էդիկ Մարտիրոսյանը բրոնզե մեդալ է նվաճել խառը մենամարտերի IMMAF 2026 աշխարհի առաջնությունում, որն անցկացվում է Աբու Դաբիում։

Մարտիրոսյանը հանդես է եկել մինչև 83,9 կգ քաշային կարգում՝ մինչև 17 տարեկան պատանիների ավագ տարիքային խմբում։ Մեդալի ճանապարհին Հայաստանի հավաքականի ներկայացուցիչը տարել է երեք հաղթանակ՝ հաջորդաբար առավելության հասնելով Ռուսաստանի, Հարավային Աֆրիկայի և Սլովակիայի ներկայացուցիչների նկատմամբ։

Կիսաեզրափակիչում հայ մարզիկը հանդիպել է ռուսաստանցի Ահմեդ Մագոմեդովի հետ և զիջել ապագա աշխարհի չեմպիոնին՝ մրցաշարն ավարտելով բրոնզե մեդալով։

Հայաստանի հավաքականի համար սա արդեն երրորդ մեդալն է IMMAF 2026 աշխարհի առաջնությունում։ Ավելի վաղ հայ մարզիկները նվաճել էին մեկ ոսկե և մեկ բրոնզե մեդալ։

Էդիկ Մարտիրոսյանը ներկայացնում է Goris Fight Club-ը։ Նրա մարզիչն է Ժորա Թումանյանը։