2027 թվականի աշխարհի առաջնության IVA դիվիզիոնը կանցկացվի Քուվեյթում․ Հայաստանի հավաքականը իմացավ մրցակիցներին
- Հեղինակ: Vahe Hakobyan
- Sportaran
2027 թվականի հոկեյի աշխարհի առաջնության IVA դիվիզիոնի մրցաշարը կանցկացվի Քուվեյթում։ Այս որոշումը կայացվել է Հոկեյի միջազգային ֆեդերացիայի՝ IIHF-ի կոնգրեսում, որն անցկացվում է Շվեյցարիայի Ցյուրիխ քաղաքում։
Այս մասին հայտնել է Հայաստանի հոկեյի ֆեդերացիայի գլխավոր քարտուղար Արամ Սարգսյանը։
Նախնական տեղեկություններով՝ Քուվեյթում կայանալիք մրցաշարը նախատեսված է 2027 թվականի ապրիլի 20-26-ը։ Առաջնությունն ընդունելու համար Քուվեյթի հետ պայքարում էր նաև Ինդոնեզիան, սակայն IIHF-ը նախապատվությունը տվել է քուվեյթյան հայտին։
Հետաքրքիր է, որ Քուվեյթը պետք է հյուրընկալեր IV դիվիզիոնի աշխարհի առաջնությունը դեռ ընթացիկ տարում, սակայն այդ մրցաշարը չեղարկվել էր։ Այժմ երկիրը հնարավորություն կստանա կազմակերպել մրցաշարը 2027 թվականին։
IVA դիվիզիոնում հանդես կգան չորս հավաքականներ.
Սինգապուր
Հայաստան
Քուվեյթ
Ինդոնեզիա
Այսպիսով, Հայաստանի հոկեյի հավաքականն իմացավ հաջորդ աշխարհի առաջնության իր մրցակիցներին։ Հայկական թիմի համար այս մրցաշարը կարևոր փուլ կլինի ավելի բարձր դիվիզիոն բարձրանալու համար պայքարում։
Հայտնի է դարձել նաև, որ 2027 թվականի աշխարհի առաջնության IVB դիվիզիոնը կանցկացվի Մալայզիայում։ Մրցաշարն ընդունելու համար հայտ էր ներկայացրել նաև Մարոկկոն, սակայն IIHF-ը ընտրել է ասիական հայտը։
IVB դիվիզիոնում կխաղան.
Իրան
Մալայզիա
Հնդկաստան
Մարոկկո
Առանձին հետաքրքրություն է առաջացնում մրցաշարի նոր ձևաչափը։ 2027 թվականից IIHF-ը նախատեսում է աշխարհի առաջնությունները ստորին դիվիզիոններում անցկացնել խմբային փուլով և փլեյ-օֆֆով։ Սակայն դեռ պարզ չէ, թե ինչպես է այդ ձևաչափը կիրառվելու չորս թիմերի մասնակցությամբ մրցաշարերում։
Ձևաչափի վերջնական մանրամասները պետք է հայտարարվեն ավելի ուշ։