Բրազիլիան և Մարոկկոն ոչ-ոքի խաղացին ԱԱ-2026-ում․ Վինիսիուսի և Սայբարիի հիանալի գոլերը

Բրազիլիայի և Մարոկկոյի հավաքականները ոչ-ոքի խաղացին 2026 թվականի աշխարհի առաջնության խմբային փուլի խաղում։ C խմբի հանդիպումը, որն անցկացվեց New York New Jersey մարզադաշտում, ավարտվեց 1:1 հաշվով։

Մարոկկոն, որը 2022 թվականի աշխարհի առաջնությունում հասել էր կիսաեզրափակիչ, կարողացավ լուրջ պայքար պարտադրել մրցաշարի գլխավոր ֆավորիտներից մեկին և հաշիվը բացեց արդեն 21-րդ րոպեին։ Բրահիմ Դիասը նուրբ փոխանցումով ճեղքեց բրազիլացիների պաշտպանությունը, իսկ Իսմայել Սայբարին դուրս եկավ դարպասապահի դիմաց և գնդակը նետեց առաջ եկած Ալիսոնի վրայով։

Բրազիլիան բավական արագ պատասխանեց։ 32-րդ րոպեին Վինիսիուս Ժունիորը Բրունո Գիմարայեշից գնդակը ստացավ տուգանային հրապարակի ձախ եզրում, տեղափոխվեց դեպի կենտրոն և հզոր հարված կատարեց աջ ոտքով։ Գնդակը հայտնվեց Յասին Բունուի պաշտպանած դարպասում, իսկ Վինիսիուսը հետագայում ճանաչվեց հանդիպման լավագույն ֆուտբոլիստ։

Մինչև ընդմիջում բրազիլացիները կարող էին առաջ անցնել հաշվի մեջ․ Լուկաս Պակետան ակրոբատիկ հարված կատարեց, սակայն Բունուն կարողացավ փրկել իր թիմին։ Երկրորդ խաղակեսում Մարոկկոյի դարպասապահը կրկին աչքի ընկավ՝ հետ մղելով Ռաֆինյայի հարվածը Վինիսիուսի փոխանցումից հետո։

Մարոկկոն նույնպես հնարավորություն ուներ հաղթանակ կորզելու ավելացված ժամանակում։ Նեյլ Էլ-Այնաուին հեռահար հարված կատարեց, Ալիսոնը հետ մղեց գնդակը, ապա արագ արձագանքեց և փակեց Այուբ Ամայմունիի լրացուցիչ հարվածը։

Խաղից հետո Մարոկկոյի հավաքականի ավագ Աշրաֆ Հակիմին նշեց, որ թիմը գոհ է իր ելույթից աշխարհի առաջնության ֆավորիտներից մեկի դեմ խաղում։

«Դա հեշտ չէր, քանի որ Բրազիլիան մրցաշարի ֆավորիտներից մեկն է։ Մենք ոչ-ոքի խաղացինք, բայց գոհ ենք մեր ելույթից։ Պետք է ամեն խաղում առաջադիմենք, պահպանենք դրական պահերը և դասեր քաղենք սխալներից», — ասել է Հակիմին։

Բրազիլիայի հավաքականի գլխավոր մարզիչ Կառլո Անչելոտին դժգոհ է մնացել հանդիպման մեկնարկից։

«Մենք այնքան էլ լավ չսկսեցինք, և դա ինձ մի փոքր անհանգստացնում է։ Մենք շատ մենապայքարներ և գնդակի վերահսկողություն կորցրեցինք, բայց երկրորդ խաղակեսում բարելավեցինք խաղը։ Մարոկկոն լավ թիմ է։ Ես ավելի լավ մեկնարկ էի սպասում, բայց նման բաներ լինում են։ Այժմ պետք է կենտրոնանալ հաջորդ խաղի վրա», — ասել է Անչելոտին։

Հետաքրքիր է, որ սա առաջին հանդիպումն էր, որում Վինիսիուս Ժունիորի գոլը Բրազիլիայի հավաքականին հաղթանակ չբերեց։ Նախորդ ութ դեպքերում նրա խփած գոլերը անփոփոխ օգնել էին բրազիլացիներին հաղթել։

Նույն C խմբում հանդես են գալիս նաև Հաիթիի և Շոտլանդիայի հավաքականները։ Նրանց հանդիպումը կկայանա այսօր՝ Երևանի ժամանակով 05:00-ին։

Բրազիլիա — Մարոկկո — 1:1
Գոլերը՝ Վինիսիուս Ժունիոր, 32 — Սայբարի, 21։