Արթուր Ավետիսյանը Եվրոպայի չեմպիոն է դարձել օղակների վարժությունում

Հայաստանի ներկայացուցիչ Արթուր Ավետիսյանը ոսկե մեդալ է նվաճել սպորտային մարմնամարզության 2026 թվականի Եվրոպայի առաջնության օղակների վարժությունում։

Եզրափակիչում Ավետիսյանը վաստակել է 14,400 միավոր։ Նույն արդյունքն է գրանցել ռուսաստանցի Իլյա Զաիկան, սակայն լրացուցիչ ցուցանիշներով հայ մարմնամարզիկը զբաղեցրել է առաջին տեղը։

Բրոնզե մեդալը 14,366 միավոր արդյունքով նվաճել է Հունաստանի օլիմպիական չեմպիոն Էլեֆթերիոս Պետրունիասը։

Հայաստանի հավաքականի ևս մեկ ներկայացուցիչ՝ Վահագն Դավթյանը, վաստակել է 14,000 միավոր և եզրափակիչն ավարտել հինգերորդ տեղում։ Գերմանիան ներկայացնող հայ մարմնամարզիկ Արթուր Սահակյանը 13,900 միավորով զբաղեցրել է յոթերորդ տեղը։

Ավետիսյանի համար սա Եվրոպայի առաջնության առաջին ոսկե մեդալն է։ Անցած տարի հայ մարմնամարզիկը դարձել էր Եվրոպայի առաջնության բրոնզե մեդալակիր, իսկ այժմ առաջին անգամ բարձրացավ պատվո հարթակի ամենաբարձր աստիճանին։

Ավելի վաղ այսօր Հայաստանի հավաքականը ևս երկու մեդալ էր նվաճել նժույգի վարժության եզրափակիչում։ Համլետ Մանուկյանը դարձել էր արծաթե մեդալակիր, իսկ Մամիկոն Խաչատրյանը նվաճել էր բրոնզե մեդալ։

Այսպիսով, Զագրեբում ընթացող մրցաշարում հայ մարմնամարզիկներն այս պահին արդեն երեք մեդալ ունեն։ Վաղը մեդալների համար պայքարը կշարունակի Արթուր Դավթյանը, որը հանդես կգա հենացատկի եզրափակիչում։