Հայ ծանրորդ Նարեկ Ռաֆայելյանը աշխարհի ռեկորդ է սահմանել պառկած դիրքից ծանրաձողի սեղմում վարժությունում

Հայ փաուերլիֆթինգիստ Նարեկ Ռաֆայելյանը աշխարհի նոր ռեկորդ է սահմանել պառկած դիրքից ծանրաձողի սեղմում վարժությունում՝ հոկտեմբերի 3-ին Մոսկվայում կայացած մրցաշարի ընթացքում։

Մարզիկը բարձրացրել է 180 կգ ծանրաձող՝ սահմանելով աշխարհի ռեկորդ WRPF-ի (World Raw Powerlifting Federation) վարկածով։

Ռաֆայելյանը պատմական արդյունքի է հասել 17–19 տարեկանների տարիքային խմբում՝ մինչև 110 կգ քաշային կարգում։ Ռեկորդը սահմանվել է առանց հատուկ հանդերձանքի, դոպինգ-ստուգմամբ պառկած դիրքից ծանրաձողի սեղմում վարժությունում (WRPF Bench Press Raw Drug Tested)։

Հայ մարզիկի նվաճումն առանձնահատուկ նշանակություն ունի, քանի որ այս կարգում աշխարհի նախորդ ռեկորդը պահպանվում էր 2016 թվականից։ Այսպիսով, Ռաֆայելյանին հաջողվել է գերազանցել մի արդյունք, որը տասը տարի շարունակ անգերազանցելի էր մնացել։

Նարեկ Ռաֆայելյանի նվաճումը պաշտոնապես հաստատվել է WRPF/WEPF ֆեդերացիաների ռեկորդի հավաստագրով, որը տրվել է Մոսկվայում կայացած մրցումների արդյունքներով։