2029 թվականին Հայաստանը կընդունի ԱՊՀ մարզական խաղերը, իսկ Երևանը կդառնա ԱՊՀ մարզական մայրաքաղաք

2029 թվականին Հայաստանը կընդունի ԱՊՀ երկրների մարզական խաղերը, իսկ Երևանը կստանա ԱՊՀ մարզական մայրաքաղաքի կարգավիճակ։ Համապատասխան որոշումը կայացվել է սեպտեմբերի 27-ին Ալմաթիում կայացած ԱՊՀ մասնակից պետությունների ֆիզիկական կուլտուրայի և սպորտի խորհրդի նիստում։

Նիստում Հայաստանը ներկայացրել է ՀՀ կրթության, գիտության, մշակույթի և սպորտի նախարարության սպորտային քաղաքականության վարչության քաղաքականության մշակման և վերլուծության բաժնի պետ Արթուր Սեդրակյանը։ Միջոցառմանը մասնակցել են ինը երկրների ներկայացուցիչներ՝ Հայաստանի, Բելառուսի, Ղազախստանի, Ղրղզստանի, Ռուսաստանի, Ադրբեջանի, Տաջիկստանի, Թուրքմենստանի և Ուզբեկստանի։

2029 թվականի խաղերի շրջանակում Հայաստանում նախատեսվում է անցկացնել նաև ԱՊՀ երկրների ֆիզիկական կուլտուրայի և սպորտի խորհրդի հերթական նիստը։ Մրցումների նպատակներից են մասնակից պետությունների միջև մարզական կապերի ամրապնդումը, ֆիզիկական կուլտուրայի և սպորտի զարգացումն ու տարբեր մարզաձևերի հանրահռչակումը։

Այսպիսով, 2029 թվականը Հայաստանի համար հագեցած կլինի խոշոր միջազգային մարզական միջոցառումներով։ ԱՊՀ խաղերից բացի, Հայաստանը Վրաստանի հետ համատեղ պետք է ընդունի մինչև 20 տարեկանների ֆուտբոլի աշխարհի առաջնությունը։

Խոշոր մարզական ծրագիր է սպասվում նաև ավելի վաղ։ 2027 թվականին Երևանում կանցկացվեն Ֆրանկոֆոնիայի խաղերը, իսկ Հայաստանը նաև պատրաստվում է ընդունել սպորտային մարմնամարզության Եվրոպայի առաջնությունն ու ծանրամարտի աշխարհի առաջնությունը։

Ավելի վաղ ԱՊՀ մարզական մայրաքաղաքի կարգավիճակ արդեն ստացել էր հայկական քաղաքներից մեկը։ 2024 թվականին այդ կոչումը շնորհվել էր Գյումրիին, որը նաև ընդունել էր ԱՊՀ երկրների ֆիզիկական կուլտուրայի և սպորտի խորհրդի միջոցառում։

Ինչ մարզաձևեր էին ընդգրկված ԱՊՀ խաղերում

ԱՊՀ երկրների նախորդ մարզական խաղերը կայացել են 2025 թվականին Ադրբեջանում։ Մրցումների ծրագրում ընդգրկված էին 19 մարզաձև և 23 մրցաձև, այդ թվում՝

• ակադեմիական թիավարություն,

• բադմինտոն,

• բասկետբոլ 3×3,

• բռնցքամարտ,

• ըմբշամարտ՝ տղամարդկանց ազատ ոճ, կանանց ազատ ոճ և հունահռոմեական,

• կարատե,

• լող,

• վոլեյբոլ,

• բայդարկա և կանոե թիավարություն,

• սպորտային մարմնամարզություն,

• ցատկեր բատուտի վրա,

• գեղարվեստական մարմնամարզություն,

• ձյուդո,

• սեղանի թենիս,

• սամբո,

• հրաձգություն՝ գնդակային և ստենդային,

• նետաձգություն,

• թաեքվոնդո,

• սուսերամարտ,

• ֆուտբոլ,

• չովգան։

Հայաստանը 2025 թվականի ԱՊՀ խաղերին չի մասնակցել։

2029 թվականին Հայաստանում կայանալիք ԱՊՀ խաղերի մրցումային ամբողջական ծրագիրը, մասնակիցների թիվը և այն քաղաքները, որոնք կընդունեն առանձին մարզաձևերի մրցումները, կհայտարարվեն ավելի ուշ։