Հայաստանը երկու անգամ հավասարեցրեց հաշիվը, բայց 89-րդ րոպեին գոլ բաց թողեց Չեռնոգորիայից

Հայաստանի հավաքականը Ազգերի լիգայի երկրորդ տուրում 2:3 հաշվով պարտվեց Չեռնոգորիային։ Եղիշե Մելիքյանի թիմը երկու անգամ հավասարեցրեց հաշիվը, սակայն հանդիպման վերջնամասում Ալեքսա Լատկովիչի գոլը հաղթանակ բերեց հյուրերին։

20-րդ րոպեին գնդակը, դիպչելով Էրիկ Փիլոյանի մեջքին, հայտնվեց Հայաստանի դարպասում։ 34-րդ րոպեին Արթուր Սերոբյանը հավասարեցրեց հաշիվը՝ օգտվելով դարպասապահ Օգնեն Չանչարևիչի փոխանցումից։ Սակայն մինչև ընդմիջում Նիկոլա Կրստովիչը կրկին առաջ մղեց Չեռնոգորիային՝ 1:2։

Երկրորդ խաղակեսում Հայաստանի հավաքականը նորից վերականգնեց հավասարությունը։ 65-րդ րոպեին Էդուարդ Սպերցյանը կենտրոնական գոտում փոխանցում ստացավ Գեորգի Հարությունյանից, շրջանցեց մի քանի մրցակցի և հեռահար ճշգրիտ հարված կատարեց։ Սա Հայաստանի հավաքականի կազմում ավագի 13-րդ գոլն էր։

Վճռորոշ դարձավ 89-րդ րոպեի դրվագը․ փոխարինման մտած Լատկովիչը խփեց Չեռնոգորիայի երրորդ գոլը։ Դրվագը VAR-ի օգնությամբ ստուգվեց հնարավոր խաղից դուրս վիճակի համար։ Ցուցադրված գրաֆիկան վեճեր առաջացրեց, սակայն գոլը հաշվվեց։

Երկու տուրից հետո Հայաստանն ունի երեք միավոր, իսկ Չեռնոգորիան՝ վեց։ Մելիքյանի թիմը հաջորդ հանդիպումը կանցկացնի հոկտեմբերի 2-ին՝ հյուրընկալվելով Կիպրոսին։ Արթուր Սերոբյանը դեղին քարտ ստացավ և բաց կթողնի այդ խաղը։ Զգուշացում ստացավ նաև Էդգար Սևիկյանը։

Հայաստան (5-2-3). Չանչարևիչ — Բանդիկյան, Փիլոյան (Մանվելյան, 90+2), Պետրոսյան, Հարությունյան, Տիկնիզյան — Իվու (Կառլեն Հովհաննիսյան, 55), Սպերցյան — Սերոբյան (Սևիկյան, 70), Շաղոյան (Նարեկ Հովհաննիսյան, 46) — Միրանյան (Ղարիբյան, 55)։

Չեռնոգորիա (4-4-2). Պոպովիչ — Ռոգանովիչ (Լատկովիչ, 68), Սավիչ, Ջուրիչ, Գաշևիչ (Ռադունովիչ, 68) — Յանկովիչ, Լոնչար (Աջիչ, 68), Վուկովիչ (Վեշովիչ, 54), Բուլատովիչ — Կրստովիչ, Օսմայիչ (Յովետիչ, 79)։