Արմեն Կարապետյանը երկրորդ տարին անընդմեջ դարձավ վետերանների ըմբշամարտի աշխարհի առաջնության բրոնզե մեդալակիր
- Հեղինակ: Vahe Hakobyan
- Sportaran
Հայ ըմբիշ Արմեն Կարապետյանը երկրորդ տարին անընդմեջ նվաճեց վետերանների ազատ ոճի ըմբշամարտի աշխարհի առաջնության բրոնզե մեդալը։ Այս անգամ մարզիկը պատվո հարթակ բարձրացավ Հորդանանի մայրաքաղաք Ամմանում անցկացված մրցաշարում։
Կարապետյանը հանդես էր գալիս մինչև 70 կգ քաշային կարգում՝ Veterans B տարիքային խմբում։ Բրոնզե մեդալի համար վճռորոշ գոտեմարտում հայ ըմբիշը վստահ հաղթանակ տարավ Մոնղոլիայի ներկայացուցիչ Արիյունբայար Դաշտսերենի նկատմամբ՝ 10։0 հաշվով, ժամանակից շուտ ավարտելով հանդիպումը տեխնիկական գերազանցության շնորհիվ։
Այս քաշային կարգում աշխարհի չեմպիոն դարձավ Ղազախստանի ներկայացուցիչ Նուրլան Սերիկբոլը։
Հատկանշական է, որ Կարապետյանը մասնակցեց նաև հունահռոմեական ոճի ըմբշամարտի մրցումներին, սակայն այս մրցաձևում հաջողության չհասավ՝ կրելով երկու պարտություն։
Միևնույն ժամանակ, հայկական ծագում ունեցող ևս մեկ ըմբիշ՝ Ռուսաստանը ներկայացնող Գևորգ Տոնոյանը, վետերանների հունահռոմեական ոճի ըմբշամարտի աշխարհի առաջնությունում նվաճեց բրոնզե մեդալ։
Այսպիսով, հայ ըմբիշները մրցանակային տեղեր զբաղեցրին Ամմանում անցկացված վետերանների աշխարհի առաջնության երկու մրցաձևերում էլ։