«Արարատը» ներկայացրել է պաշտոնական դիրքորոշումը «Փյունիկի» դեմ խաղում Վարազդատ Հարոյանի հեռացման վերաբերյալ

«Արարատ» ֆուտբոլային ակումբը պաշտոնական դիմում է ներկայացրել Հայաստանի ֆուտբոլի ֆեդերացիայի Կարգապահական և էթիկայի կոմիտե՝ օգոստոսի 21-ին «Փյունիկի» դեմ խաղի 55-րդ րոպեին տեղի ունեցած դրվագի վերաբերյալ։

Ակումբը նշել է, որ չի աջակցում ֆուտբոլիստների ֆիզիկական արձագանքին, սակայն կարծում է, որ թիմի ավագ Վարազդատ Հարոյանի գործողությունները պետք է դիտարկվեն՝ հաշվի առնելով դրան նախորդած իրավիճակը՝ մրցակցի կողմից հրահրված սադրանքը։

«Արարատի» վարկածով՝ «Փյունիկի» ֆուտբոլիստ Յասոնաս Պիկիսը խաղային դրվագից հետո ինքն է մոտեցել Հարոյանին, մոտ տարածությունից խոսել է նրա հետ՝ ձեռքով փակելով բերանը, ինչից հետո «Արարատի» ավագը մեկ անգամ արձագանքել է՝ հրելով մրցակցին։ Ակումբը ընդգծել է, որ Հարոյանի կողմից հետագա ագրեսիվ գործողություններ չեն եղել։

«Արարատը» նաև ուշադրություն է հրավիրել IFAB-ի կանոնակարգերին, որոնք վերաբերում են ֆուտբոլիստների նմանատիպ վարքագծին մրցակիցների հետ շփման ժամանակ։ Ակումբը կարծում է, որ մոտ տարածությունից բերանը փակած խոսելը կարող է ունենալ սադրիչ բնույթ և նշում է, որ Հայաստանի մրցաշարերում նման նորմի պարտադիր կիրառման բացակայությունը դարձել է նման իրավիճակի առաջացման պատճառներից մեկը։

Ակումբի կարծիքով՝ հենց «Փյունիկի» ֆուտբոլիստի սադրանքն է դարձել միջադեպի անմիջական պատճառը։ Միաժամանակ «Արարատում» կարծում են, որ Հարոյանի արձագանքը եղել է ակնթարթային, իսկ թիմն արդեն լուրջ հետևանքներ է կրել ավագի հեռացման պատճառով։

Իր դիմումով ակումբը խնդրել է Կարգապահական կոմիտեին՝

• Վարազդատ Հարոյանի նկատմամբ լրացուցիչ պատիժ չկիրառել կամ սահմանել պայմանական պատժամիջոց՝ սահմանափակվելով մեկ խաղի որակազրկմամբ;
• «Արարատի» նկատմամբ տուգանք չկիրառել կամ սահմանել նվազագույն պատիժ;
• Կարգապահական գնահատական տալ Յասոնաս Պիկիսի վարքագծին, որը ակումբը համարում է սադրիչ։

«Արարատը» հայտարարել է, որ սպասում է իրավիճակի համաչափ գնահատականի և կարգապահական մարմինների կողմից արդար որոշման։