«Անդրանիկը» ջախջախեց «Էջմիածնին» և դուրս եկավ Հայաստանի գավաթի 1/8 եզրափակիչ

Հայաստանի Առաջին լիգան ներկայացնող «Անդրանիկը» վստահ հաղթահարեց Հայաստանի գավաթի նախնական փուլը՝ 5:0 հաշվով ջախջախելով սիրողական «Էջմիածնին»։

Հանդիպումը կայացավ Չարենցավանի «Քաղաքային» մարզադաշտում։ Արդեն 8-րդ րոպեին հաշիվը բացեց Մաուրո Բենեդիտո Դոս Սանտոս Նետոն։

Առաջին խաղակեսի գլխավոր հերոսը դարձավ Հովսեփ Հակոբյանը, որը տասը րոպեի ընթացքում հեթ-տրիկ ձևակերպեց՝ աչքի ընկնելով 29-րդ, 32-րդ և 39-րդ րոպեներին։

Հանդիպման վերջնական հաշիվը մրցավարի կողմից ավելացված ժամանակի երրորդ րոպեին ձևակերպեց Վահե Զաքարյանը՝ խփելով «Անդրանիկի» հինգերորդ գոլը։

Այսպիսով, «Անդրանիկը» նվաճեց Հայաստանի գավաթի 1/8 եզրափակիչի ուղեգիր։ Ավելի վաղ այս փուլ էր դուրս եկել նաև «Ավշար Արարատը»։

Հիշեցնենք, որ նախորդ մրցաշրջանում «Անդրանիկը» դարձավ գավաթի խաղարկության գլխավոր անակնկալներից մեկը՝ հասնելով մինչև կիսաեզրափակիչ։

Հայաստանի գավաթ, նախնական փուլ

«Անդրանիկ» — «Էջմիածին»՝ 5:0

Գոլեր՝ Մաուրո Բենեդիտո Դոս Սանտոս Նետո՝ 8, Հովսեփ Հակոբյան՝ 29, 32, 39, Վահե Զաքարյան՝ 90+3։

Մրցավար՝ Սմբատ Ախվերդյան։

Մարզադաշտ՝ Չարենցավան, «Քաղաքային» մարզադաշտ։