Ալինա Սուքիասյանը երկամարտում արդյունք չգրանցեց ծանրամարտի ԱԱ-2026-ում․ չինացի Պեն Ցույթինը սահմանեց աշխարհի ռեկորդ

Նոյեմբերի 5-ին Չինաստանի Նինբո քաղաքում ընթացող ծանրամարտի աշխարհի 2026 թվականի առաջնությունում ավարտվեցին կանանց 77 կգ քաշային կարգի մրցումները։ Ոսկե մեդալը նվաճեց չինացի Յան Ցյուսյան, իսկ նրա հայրենակից Պեն Ցույթինը պոկում վարժությունում սահմանեց աշխարհի ռեկորդ։ Հայաստանի ներկայացուցիչ Ալինա Սուքիասյանը չկարողացավ երկամարտում գրանցել վերջնական արդյունք։

Ալինա Սուքիասյանը հանդես եկավ C խմբում։ Պոկում վարժությունում հայ ծանրորդուհին հաջողությամբ բարձրացրեց 95 և 98 կգ, սակայն երրորդ մոտեցման ժամանակ չկարողացավ հաղթահարել 101 կգ կշռող ծանրաձողը։ 98 կգ արդյունքով նա զբաղեցրեց 22-րդ տեղը։

Հրում վարժությունում Սուքիասյանը երեք անգամ փորձեց բարձրացնել 120 կգ, սակայն բոլոր մոտեցումներն անհաջող էին։ Արդյունքում Հայաստանի ներկայացուցիչը երկամարտում արդյունք չգրանցեց։

Աշխարհի չեմպիոն դարձավ Յան Ցյուսյան, որը երկամարտում գրանցեց 265 կգ (120+145) արդյունք։ Արծաթե մեդալը նվաճեց Պեն Ցույթինը՝ 262 կգ (126+136), իսկ բրոնզե մեդալակիր դարձավ եգիպտացի Սառա Ահմեդը՝ 258 կգ (114+144)։

Մրցումների գլխավոր ձեռքբերումը Պեն Ցույթինի սահմանած աշխարհի ռեկորդն էր պոկում վարժությունում՝ 126 կգ։ Չինացի ծանրորդուհին մրցումների ընթացքում երկու անգամ թարմացրեց աշխարհի ռեկորդը՝ նախ բարձրացնելով 124 կգ, ապա բարելավելով արդյունքը ևս երկու կիլոգրամով։

Ռուսաստանցի Վարվառա Կուզմինովան պոկում վարժությունում 115 կգ արդյունքով նվաճեց փոքր բրոնզե մեդալ։ Երկամարտում նա զբաղեցրեց հինգերորդ տեղը՝ գրանցելով 253 կգ։

ԱԱ-2026-ի արդյունքները․ կանայք, 77 կգ

Երկամարտ

1. Յան Ցյուսյա (Չինաստան) — 265 կգ (120+145)

2. Պեն Ցույթին (Չինաստան) — 262 կգ (126+136)

3. Սառա Ահմեդ (Եգիպտոս) — 258 կգ (114+144)

Պոկում

1. Պեն Ցույթին (Չինաստան) — 126 կգ (աշխարհի ռեկորդ)

2. Յան Ցյուսյա (Չինաստան) — 120 կգ

3.  Վարվառա Կուզմինովա (Ռուսաստան) — 115 կգ

Հրում

1. Յան Ցյուսյա (Չինաստան) — 145 կգ

2. Սառա Ահմեդ (Եգիպտոս) — 144 կգ

3.  Մարիա Մենա (Կոլումբիա) — 141 կգ

Ծանրամարտի աշխարհի 2026 թվականի առաջնությունն անցկացվում է Չինաստանի Նինբո քաղաքում՝ հոկտեմբերի 27-ից նոյեմբերի 8-ը։