Ալեքսանդրա Գրիգորյանը դարձավ ծանրամարտի Մ23 Եվրոպայի չեմպիոն՝ նվաճելով երեք ոսկե մեդալ

Հայ ծանրորդ Ալեքսանդրա Գրիգորյանը դարձել է մինչև 23 տարեկանների (Մ23) ծանրամարտի Եվրոպայի 2026 թվականի չեմպիոն։ Ալբանիայի Դուրրես քաղաքում ընթացող առաջնությունում Հայաստանի հավաքականի ներկայացուցիչը 57 կգ քաշային կարգում նվաճել է երեք ոսկե մեդալ՝ պոկում, հրում վարժություններում և երկամարտի արդյունքում։

Հոկտեմբերի 14-ին Գրիգորյանը վստահ հաղթանակ է տարել՝ երկամարտում գրանցելով 202 կգ (90+112) արդյունք և մոտակա մրցակցին գերազանցելով 9 կգ-ով։

Պոկում վարժությունում հայ մարզուհին հաջողությամբ բարձրացրել է 85 և 90 կգ ծանրաձողերը։ 90 կգ արդյունքը նրան թույլ է տվել զբաղեցնել առաջին տեղը և նվաճել փոքր ոսկե մեդալը։

Հրում վարժությունում Գրիգորյանը նույնպես գերազանցել է բոլոր մրցակիցներին՝ հաջորդաբար բարձրացնելով 106, 109 և 112 կգ։ Երեք մոտեցումներն էլ հաջող են եղել, իսկ 112 կգ արդյունքը նրան բերել է երկրորդ փոքր ոսկե մեդալը։

Երկամարտի արդյունքում Ալեքսանդրան հավաքել է 202 կգ և դարձել իր քաշային կարգի բացարձակ հաղթողը։

Ծանրամարտի Եվրոպայի Մ23 առաջնություն 2026․ արդյունքներ՝ կանայք, 57 կգ

1. Ալեքսանդրա Գրիգորյան (Հայաստան) — 202 կգ (90+112)։

2. Դանա Բերչի (Ռումինիա) — 193 կգ (85+108)։

3.  Մերվ Իլդեն (Թուրքիա) — 187 կգ (83+104)։

Այսպիսով, Ալեքսանդրա Գրիգորյանը Հայաստանի հավաքականին պարգևել է 2026 թվականի երիտասարդական Եվրոպայի առաջնության առաջին մեծ ոսկե մեդալը։

Ավելի վաղ Դուրրեսում ընթացող առաջնությունում Սեյրան Խուդանյանը (60 կգ, Մ23) նվաճել էր բրոնզե մեդալ երկամարտում և փոքր բրոնզ՝ հրում վարժությունում, իսկ Դավիթ Առաքելյանը (65 կգ, Մ20) դարձել էր պոկում վարժության արծաթե մեդալակիր։

Մինչև 20 և մինչև 23 տարեկանների ծանրամարտի Եվրոպայի առաջնությունը շարունակվում է Ալբանիայում։