Ալբերտ Ալեքսանյանը հրավիրվել է Լատվիայի հավաքական և կարող է նորամուտը նշել Հայաստանի դեմ խաղում

Ալբերտ Ալեքսանյանի՝ ազգային հավաքականի ընտրության պատմությունը, կարծես, մոտեցել է ավարտին։ Շվեդական «Նորչյոպինգի» 20-ամյա ֆուտբոլիստն առաջին անգամ հրավիրվել է Լատվիայի ազգային հավաքական և կարող է նորամուտը նշել արդեն Հայաստանի դեմ խաղում։ Լատվիայի պաշտոնական հայտացուցակում նրա անունը նշված է որպես Alberts Aleksanjans։

Լատվիայի հավաքականի գլխավոր մարզիչ Պաոլո Նիկոլատոն Ալեքսանյանին ընդգրկել է սեպտեմբեր-հոկտեմբերյան հավաքի հայտացուցակում, որի ընթացքում լատվիացիները Ազգերի լիգայում կանցկացնեն չորս հանդիպում։

Հատկանշական է, որ Ալեքսանյանի հնարավոր նորամուտը կարող է կայանալ հենց Երևանում։ C2 խմբի առաջին տուրում Լատվիայի հավաքականը սեպտեմբերի 25-ին հյուրընկալվելիս կմրցի Հայաստանի հետ։

Ալեքսանյանը կարող էր հանդես գալ երեք հավաքականների կազմում

Ավելի վաղ Sportaran-ը գրել էր ֆուտբոլիստի միջազգային ապագայի շուրջ ստեղծված բարդ իրավիճակի մասին։ Ալեքսանյանը ծնվել է Լատվիայում, նրա հայրը հայ է, իսկ մայրը՝ լատվիացի, մինչդեռ երեք տարեկանից նա մեծացել է Նորվեգիայում։ Դրա շնորհիվ ֆուտբոլիստը հնարավորություն ուներ ներկայացնելու միանգամից երեք երկիր՝ Հայաստանը, Լատվիան և Նորվեգիան։

Լատվիայի ուղղությամբ առաջին քայլն Ալեքսանյանն արեց ամռանը։ 2026 թվականի հունիսին նա հրավիրվեց երկրի երիտասարդական հավաքական և Լատվիայի Մ21 հավաքականի կազմում անցկացրեց երկու հանդիպում։ Այժմ հարձակվողն առաջին անգամ ընդգրկվել է ազգային գլխավոր թիմի կազմում։

Հրավերն ինքնին դեռ չի նշանակում նորամուտ պաշտոնական խաղում, սակայն երիտասարդական հավաքականում ելույթներից և գլխավոր թիմի հրավերն ընդունելուց հետո Ալեքսանյանի ընտրությունը հօգուտ Լատվիայի, գործնականում, որոշված է թվում։

Եվ այժմ ճակատագիրը կարող է նրան միանգամից բավական խորհրդանշական նորամուտ պարգևել՝ իր հոր հայրենիքի հավաքականի դեմ։

Եվս մեկ հավանական նորեկ՝ Դենիս Չիրկին

Լատվիայի հայտացուցակում ընդգրկվել է նաև անգլիական «Քուինզ Պարկ Ռեյնջերսի» պաշտպան Դենիս Չիրկինը (Denniss Cirkins), որը դեռևս ոչ մի հանդիպում չի անցկացրել ազգային գլխավոր թիմի կազմում։

Չիրկինը ծնվել է Դուբլինում՝ Դաուգավպիլսից գաղթածների ընտանիքում, իսկ մանկության տարիներին տեղափոխվել է Անգլիա։ Նա անցել է «Տոտենհեմի» ակադեմիան և նախկինում հանդես է եկել Անգլիայի Մ16, Մ17, Մ18 և Մ20 հավաքականներում։ Դեռ մարտին պաշտպանը առաջին անգամ միացել էր Լատվիայի ազգային թիմին, սակայն այդ ժամանակ իրավական ձևակերպումները նրան թույլ չէին տալիս դուրս գալ խաղադաշտ։

Այսպիսով, Հայաստանի հետ խաղում Լատվիայի հավաքականի միանգամից երկու հետաքրքիր նորեկներ կարող են նորամուտի հնարավորություն ստանալ։

Հետաքրքիր է, որ սա 2026 թվականին արդեն առաջին նման դեպքը չէ։ Մարտին կայացած Հայաստան — Բելառուս խաղում Բելառուսի հավաքականի կազմում խաղացել էր հայկական ծագում ունեցող հարձակվող Կարեն Վարդանյանը։

Հայերը Հայաստանի դեմ․ ովքեր են խաղացել այլ հավաքականների կազմում

Լատվիայի հավաքականի կազմը Ազգերի լիգա 2026/27-ի համար

Դարպասապահներ․

• Rihards Matrevics — RFS
• Nils Toms Puriņš — «Աուդա»
• Frenks Dāvids Orols — «Ռիգա»

Պաշտպաններ․

• Roberts Savaļnieks — RFS
• Andrejs Cigaņiks — «Լյուցեռն» (Շվեյցարիա)
• Raivis Andris Jurkovskis — «Ռիգա»
• Antonijs Černomordijs — «Ռիգա»
• Daniels Balodis — «Աուդա»
• Deniss Meļņiks — «Ֆալկիրկ» (Շոտլանդիա)
• Maksims Toņiševs — «Ռիգա»
• Oskars Vientiess — «Տեպլիցե» (Չեխիա)
• Denniss Cirkins — «Քուինզ Պարկ Ռեյնջերս» (Անգլիա)
• Oskars Rubenis — «Աուդա»

Կիսապաշտպաններ․

• Aleksejs Saveļjevs — «Ասիա Տալաս» (Ղրղզստան)
• Eduards Emsis — «Սուպեր Նովա»
• Eduards Dašķevičs — «Աուդա»
• Dmitrijs Zelenkovs — RFS
• Lūkass Vapne — «Սոգնդալ» (Նորվեգիա)
• Kristaps Grabovskis — «Դիլա» (Վրաստան)
• Gļebs Žaleiko — «Ելգավա»
• Danila Patijčuks — «Լիեպայա»
• Markuss Strods — «Բոհեմիան» (Իռլանդիա)

Հարձակվողներ․

• Jānis Ikaunieks — RFS
• Vladislavs Gutkovskis — «Արկա» (Լեհաստան)
• Roberts Uldriķis — «Հերենվեն» (Նիդեռլանդներ)
• Alberts Aleksanjans — «Նորչյոպինգ» (Շվեդիա)

Հայաստանի հետ հանդիպումից հետո Լատվիան սեպտեմբերի 28-ին կընդունի Կիպրոսին, հոկտեմբերի 2-ին տանը կմրցի Չեռնոգորիայի հետ, իսկ հոկտեմբերի 5-ին արտագնա խաղ կանցկացնի Կիպրոսի դեմ։

Հայաստան — Լատվիա հանդիպումը կկայանա սեպտեմբերի 25-ին Երևանում՝ Վազգեն Սարգսյանի անվան Հանրապետական մարզադաշտում։

Հայաստանի հավաքականի կազմի վերլուծություն․ սխեմաների տարբերակները, հարձակվողի խնդրահարույց դիրքն ու հնարավոր մեկնարկային կազմը