Հայկական ծագում ունեցող 14 ֆուտբոլիստներ խաղացին Ռուսաստանի գավաթի «Տարածաշրջանների ուղու» երկրորդ փուլում
Photo: Artur Ananyan / FC Nosta
- Հեղինակ: Vahe Hakobyan
- Sportaran
Ռուսաստանի ֆուտբոլի գավաթի «Տարածաշրջանների ուղու» երկրորդ փուլի հանդիպումները կայացան օգոստոսի 11-ին և 12-ին։ Մրցաշարի այս փուլում հանդես են գալիս ցածր դիվիզիոնների ակումբներն ու սիրողական թիմերը, մինչդեռ Ռուսաստանի Պրեմիեր լիգայի ներկայացուցիչները զուգահեռ անցկացնում են ՌՊԼ-ի ուղու խմբային փուլի հանդիպումները։
«Տարածաշրջանների ուղու» երկրորդ փուլում խաղադաշտ դուրս եկան հայկական ծագում ունեցող միանգամից 14 ֆուտբոլիստներ։ Նրանցից չորսը նախկինում ներգրավված են եղել Հայաստանի պատանեկան կամ երիտասարդական հավաքականներում։
Ներկայացնում ենք, թե ինչպես են դրսևորել իրենց հայ ֆուտբոլիստները Ռուսաստանի գավաթի հանդիպումներում։
«Դինամո ՍՊԲ» — «ՖԿ 10» — 2:1
20-ամյա կիսապաշտպան Ռոման Թորոսյանը Սանկտ Պետերբուրգի «Դինամոյի» կազմում անցկացրեց ամբողջ 90 րոպեն և դարձավ գոլային փոխանցման հեղինակ՝ օգնելով իր թիմին դուրս գալ հաջորդ փուլ։
«Նարտ» — «Դինամո Ստավրոպոլ» — 1:2
Ստավրոպոլի «Դինամոյի» կազմում խաղացին հայկական ծագում ունեցող միանգամից երկու 18-ամյա ֆուտբոլիստներ։
Պաշտպան Յանիս Գրիգորյանը և կիսապաշտպան Արկադի Գյուլուշանյանը խաղադաշտում անցկացրին 70-ական րոպե։
«Անգուշտ» Նազրան — «Դրուժբա» Մայկոպ — 0:0, 2:4՝ 11-մետրանոցներով
19-ամյա պաշտպան Մատվեյ Աղասյանը խաղադաշտ դուրս եկավ ընդմիջումից հետո և «Անգուշտի» կազմում անցկացրեց ամբողջ երկրորդ խաղակեսը։
Հիմնական ժամանակն ավարտվեց առանց գոլերի, իսկ 11-մետրանոցների շարքում ավելի դիպուկ գտնվեց Մայկոպի «Դրուժբան»։ Աղասյանը 11-մետրանոցների շարքում հարված չկատարեց։
«Մուրոմ» — «Մետալուրգ» Լիպեցկ — 0:0, 5:3՝ 11-մետրանոցներով
Այս խաղում հայ ֆուտբոլիստներ կային երկու թիմերի կազմերում։
22-ամյա պաշտպան Ռուսլան Բաբայանը «Մուրոմի» կազմում անցկացրեց ամբողջ հանդիպումը, իսկ 18-ամյա կիսապաշտպան Վարդան Մարգարյանը Լիպեցկի «Մետալուրգի» կազմում խաղաց բոլոր 90 րոպեները։
Հետխաղյա 11-մետրանոցների շարքում ոչ Բաբայանը, ոչ էլ Մարգարյանը մասնակցություն չունեցան։
Ռուսլան Բաբայանը նախկինում հրավիրվել է Հայաստանի երիտասարդական հավաքական, երբ հանդես էր գալիս «Կրասնոդարի» համակարգում։
«Վոլնա» — «Տյումեն» — 2:1
22-ամյա կիսապաշտպան Արտեմի Գունկոն «Վոլնայի» կազմում անցկացրեց ամբողջ հանդիպումը և իր հաշվին գրանցեց գոլային փոխանցում։
Այս ամռանը Գունկոն վերադարձել է Ռուսաստան Երևանի «Ուրարտուում» ելույթներից հետո։ Նախկինում ֆուտբոլիստը հրավիրվել էր Հայաստանի երիտասարդական հավաքական, սակայն դրա կազմում խաղադաշտ դուրս չէր եկել։
«Իրտիշ» — «Սատուրն» — 1:1, 4:2՝ 11-մետրանոցներով
Օմսկի «Իրտիշի» կազմում խաղացին հայկական ծագում ունեցող երկու ֆուտբոլիստներ։
24-ամյա կիսապաշտպան Արման Մարկոսյանը անցկացրեց առաջին խաղակեսը, իսկ 20-ամյա Գևորգ Գալստյանը խաղադաշտ դուրս եկավ 80-րդ րոպեին։
Գալստյանը նախկինում հանդես է եկել Հայաստանի Մ17 հավաքականի կազմում, երբ «Տյումենի» ֆուտբոլիստ էր։
«Շումբրատ» — 2Drots — 1:1, 4:5՝ 11-մետրանոցներով
23-ամյա կիսապաշտպան Արտյոմ Աբրամյանը ընդգրկված էր 2Drots-ի մեկնարկային կազմում և խաղադաշտում անցկացրեց 63 րոպե։
Հանդիպման հաղթողը որոշվեց 11-մետրանոցների շարքում, որտեղ ավելի դիպուկ գտնվեցին 2Drots-ի ֆուտբոլիստները։
«Աստրախան» — «Մաշուկ-ԿՄՎ» — 1:1, 4:3՝ 11-մետրանոցներով
«Մաշուկ-ԿՄՎ»-ի կազմում խաղացին Սևադա Թորոսյանը և Ալեքսանդր Մկրտչյանը։
25-ամյա Թորոսյանը խաղադաշտում անցկացրեց 78 րոպե, իսկ 22-ամյա հարձակվող Մկրտչյանը՝ 65 րոպե։
Ալեքսանդր Մկրտչյանը նախկինում ութ հանդիպում է անցկացրել Հայաստանի Մ19 հավաքականի կազմում։
«Տոսնո» — «Չերեպովեց» — 0:0, 4:5՝ 11-մետրանոցներով
21-ամյա կիսապաշտպան Ալեքսանդր Այլոյանը «Տոսնոյի» կազմում անցկացրեց ամբողջ հանդիպումը։
Հետխաղյա 11-մետրանոցների շարքում Այլոյանը կատարեց իր թիմի հարվածներից մեկը, սակայն չկարողացավ այն իրացնել։
Նշենք, որ «Տարածաշրջանների ուղու» առաջին փուլում Ալեքսանդրը դուբլ էր ձևակերպել «Կիրովեց-Վոսխոժդենիեի» դարպասը, իսկ «Տոսնոն» հաղթել էր 3:0 հաշվով։
«Խիմիկ» — «Նոստա» — 2:3
«Տարածաշրջանների ուղու» երկրորդ փուլում հայկական ծագում ունեցող ֆուտբոլիստներից ամենաարդյունավետը դարձավ Արթուր Անանյանը։
«Նոստայի» 20-ամյա կիսապաշտպանը խաղադաշտում անցկացրեց 83 րոպե և մասնակցեց իր թիմի բոլոր երեք գոլերին՝ ձևակերպելով դուբլ և կատարելով գոլային փոխանցում։
Այսպիսով, Անանյանն իր հաշվին գրանցեց 2 գոլ և 1 գոլային փոխանցում՝ առանցքային ներդրում ունենալով «Նոստայի»՝ 3:2 հաշվով հաղթանակում։
14 հայ ֆուտբոլիստներ Ռուսաստանի գավաթի երկրորդ փուլում
Ընդհանուր առմամբ Ռուսաստանի գավաթի «Տարածաշրջանների ուղու» երկրորդ փուլի հանդիպումներին մասնակցեցին հայկական ծագում ունեցող 14 ֆուտբոլիստներ՝
Ռոման Թորոսյան, Յանիս Գրիգորյան, Արկադի Գյուլուշանյան, Մատվեյ Աղասյան, Ռուսլան Բաբայան, Վարդան Մարգարյան, Արտեմի Գունկո, Արման Մարկոսյան, Գևորգ Գալստյան, Արտյոմ Աբրամյան, Սևադա Թորոսյան, Ալեքսանդր Մկրտչյան, Ալեքսանդր Այլոյան և Արթուր Անանյան։
Ամենավառ ելույթն ունեցավ Արթուր Անանյանը՝ վաստակելով երեք արդյունավետ միավոր։ Ռոման Թորոսյանն ու Արտեմի Գունկոն նույնպես աչքի ընկան գոլային փոխանցումներով։
Այս փուլի մասնակիցներից Ռուսլան Բաբայանը, Արտեմի Գունկոն, Գևորգ Գալստյանը և Ալեքսանդր Մկրտչյանը նախկինում հրավիրվել կամ հանդես են եկել Հայաստանի տարբեր տարիքային հավաքականներում։