ՀԱՀ-ն սենսացիոն կերպով դուրս եկավ ԱԱ-2026-ի փլեյ-օֆֆ և կխաղա Կանադայի դեմ
- Հեղինակ: Vahe Hakobyan
- Sportaran
Հարավային Աֆրիկայի հավաքականը դարձավ 2026 թվականի աշխարհի առաջնության A խմբի գլխավոր հայտնությունը։ Վերջին տուրում ՀԱՀ-ն 1:0 հաշվով հաղթեց Հարավային Կորեային և զբաղեցրեց երկրորդ տեղը՝ իր պատմության մեջ առաջին անգամ դուրս գալով աշխարհի առաջնության փլեյ-օֆֆ։
Վճռորոշ գոլի հեղինակ դարձավ Տապելո Մասեկոն։ Խաղից հետո հաղթական գոլի հեղինակը այս հաջողությունը անվանեց «երազանք» և շնորհակալություն հայտնեց երկրպագուներին՝ թե՛ մարզադաշտում, թե՛ հայրենիքում ցուցաբերած աջակցության համար։
ՀԱՀ հավաքականի գլխավոր մարզիչ Ուգո Բրոոսը նշեց, որ իր թիմը շատ ուժեղ հանդիպում անցկացրեց պաշտպանությունում և գրեթե թույլ չտվեց մրցակցին ազատ տարածություններ գտնել։ Նրա խոսքով՝ խփած գոլից հետո վերջին 20 րոպեները վերածվեցին իսկական փորձության, սակայն թիմը դիմացավ ճնշմանը և խաղը հասցրեց հաղթանակի։
1/16 եզրափակչում Հարավային Աֆրիկան կխաղա Կանադայի դեմ։ Հանդիպումը կկայանա Լոս Անջելեսում՝ կիրակի օրը։
Զուգահեռ խաղում Մեքսիկայի հավաքականը վստահորեն հաղթեց Չեխիային՝ 3:0 հաշվով։ Ընդ որում, մրցաշարի համակազմակերպիչները նախապես ապահովել էին առաջին տեղը խմբում և հանդիպումն անցկացրին կազմի լուրջ ռոտացիայով։
Գոլազուրկ առաջին խաղակեսից հետո Մեքսիկան ամբողջությամբ փոխեց խաղի ընթացքը։ Հաշիվը բացեց Մատեո Չավեսը՝ Ռաուլ Խիմենեսի փոխանցումից հետո։ Մի քանի րոպե անց մեքսիկացիների առավելությունը կրկնապատկեց Խուլիան Կինյոնեսը, իսկ ավելացված ժամանակում Ալվարո Ֆիդալգոն վերջակետ դրեց հանդիպմանը։
Առանձին իրադարձություն դարձավ Գիլյերմո Օչոայի դաշտ դուրս գալը։ Լեգենդար դարպասապահը, որը մասնակցում է արդեն իր վեցերորդ աշխարհի առաջնությանը, փոխարինման դուրս եկավ խաղավերջում և անցկացրեց իր 153-րդ հանդիպումը Մեքսիկայի հավաքականի կազմում։
Մեքսիկան առաջին տեղով դուրս եկավ փլեյ-օֆֆ և 1/16 եզրափակչում կխաղա երրորդ տեղ զբաղեցրած լավագույն թիմերից մեկի դեմ։ Չեխիան պարտությունից հետո ավարտեց ելույթները մրցաշարում։
Հարավային Կորեան, չնայած պարտությանը, պահպանում է երրորդ տեղով փլեյ-օֆֆ դուրս գալու շանսերը։ Այս պահին կորեացիները երրորդ տեղերի աղյուսակում գերազանցում են միայն Շոտլանդիային։
A խմբի երրորդ տուրի արդյունքները
ՀԱՀ — Հարավային Կորեա — 1:0
Մեքսիկա — Չեխիա — 3:0
