Մեսսին խփեց իր 17-րդ գոլն աշխարհի առաջնություններում և առաջ մղեց Արգենտինային Ավստրիայի դեմ խաղում
- Հեղինակ: Vahe Hakobyan
- Sportaran
Լիոնել Մեսսին շարունակում է վերաշարադրել աշխարհի առաջնությունների պատմությունը։ Արգենտինայի հավաքականի ավագը գոլի հեղինակ դարձավ ՉՄ-2026-ի երկրորդ տուրի՝ Ավստրիայի դեմ խաղում և աշխարհի առաջնություններում իր գոլերի թիվը հասցրեց ռեկորդային 17-ի։
Մեսսիի համար այս գնդակը դարձավ արդեն չորրորդը ընթացիկ մրցաշարում։ Ավելի վաղ արգենտինացին հեթ-տրիկ էր ձևակերպել Ալժիրի հավաքականի դարպասը, իսկ այժմ աչքի ընկավ նաև Ավստրիայի դեմ խաղում՝ ամրապնդելով իր առաջատար դիրքը ՉՄ-2026-ի լավագույն ռմբարկուների ցանկում։
Խաղը Մեսսիի համար հեշտ չսկսվեց։ Արդեն 8-րդ րոպեին նա չկարողացավ իրացնել 11-մետրանոց հարվածը․ Ավստրիայի հավաքականի դարպասապահ Ալեքսանդր Շլագերը կարողացավ հետ մղել լեգենդար հարձակվողի հարվածը։ Դրանից հետո Մեսսին ևս մի քանի լավ հնարավորություն ուներ գոլ խփելու համար, սակայն ավստրիացի դարպասապահը շարունակում էր փրկել իր թիմին։
Այնուամենայնիվ, 38-րդ րոպեին Արգենտինայի ավագը հասավ իր նպատակին։ Գեղեցիկ անցումից և փոխանցումից հետո Մեսսին հայտնվեց ճիշտ դիրքում և իր բնորոշ ձախ ոտքի հարվածով գնդակն ուղարկեց ցանցը՝ հաշիվը դարձնելով 1:0 հօգուտ Արգենտինայի հավաքականի։
Այս գոլը պատմական դարձավ Մեսսիի համար։ Այժմ նրա հաշվին աշխարհի առաջնություններում կա 17 գոլ՝ մրցաշարի պատմության լավագույն ցուցանիշը։ Բացի այդ, արգենտինացին միանձնյա գլխավորում է ընթացիկ մունդիալի ռմբարկուների պայքարը։
Նույնիսկ չիրացված 11-մետրանոցից հետո Մեսսին կարողացավ պատասխանել այնպես, ինչպես դա արել է իր ողջ կարիերայի ընթացքում՝ կարևոր պահին որոշիչ գոլով։
Մեծագույնը։