Հայդայվեր Նիկիտա Ֆեդոտովը Սինգապուրում կայացող աշխարհի առաջնությունում իր նորամուտը նշեց Հայաստանի կազմում

30-ամյա հայդայվեր Նիկիտա Ֆեդոտովն առաջին անգամ հանդես է գալիս Հայաստանի դրոշի ներքո՝ 2025 թվականի ջրային մարզաձևերի աշխարհի առաջնությունում, որն անցկացվում է Սինգապուրում։ Հայդայվինգի մրցումները սկսվել են 27 մետր բարձրությունից ցատկերով, և Նիկիտան անմիջապես իր հզորությունն է ցույց տվել․ նրա առաջին ցատկը գրեթե կատարյալ էր ու գնահատվել է 71.4 միավորով՝ ապահովելով երրորդ տեղը առաջին փուլի արդյունքում։

Սակայն երկրորդ փուլում Ֆեդոտովը սխալ թույլ տվեց, ինչի հետևանքով ստացավ ընդամենը 57.6 միավոր և նահանջեց մինչև 23 մասնակիցներից 19-րդ հորիզոնական։ Այնուամենայնիվ, մարզիկը դեռ հնարավորություն ունի բարելավելու իր արդյունքը․ մրցաշարի ավարտին մնացել է երկու մրցակցային օր և չորս ցատկ, որոնք կկայանան մինչև հուլիսի 27-ը։

Ֆեդոտովը փորձառու մարզիկ է, նախկինում հանդես է եկել Ռուսաստանի հավաքականում, իսկ 2025 թվականից ներկայացնում է Հայաստանը։ Նրա միջազգային փորձն ու բարձր մեկնարկային արդյունքը հույս են ներշնչում հաջորդ փուլերում վստահ ելույթի համար։

2025 թվականի աշխարհի առաջնության հայ մարզիկների կազմը և ժամանակացույցը կարող եք դիտել ԱՅՍՏԵՂ։