Ֆրանսիան խմբում հաղթեց +8 գոլերի տարբերությամբ․ Սենեգալը ջախջախեց Իրաքին և սպասում է փլեյ-օֆֆ դուրս գալուն

Ֆրանսիայի հավաքականը վստահ ավարտեց 2026 թվականի աշխարհի առաջնության խմբային փուլը և առաջին տեղով դուրս եկավ 1/16 եզրափակիչ։

Վերջին տուրում Ֆրանսիան 4:1 հաշվով հաղթեց Նորվեգիային։ Հանդիպման գլխավոր հերոսը դարձավ Ուսման Դեմբելեն, որը հեթ-տրիկ ձևակերպեց արդեն առաջին խաղակեսում։ Նա գոլեր խփեց 7-րդ, 20-րդ և 32-րդ րոպեներին։ Նորվեգիայի կազմում աչքի ընկավ Թելո Օսգորը՝ 21-րդ րոպեին, իսկ ավելացված ժամանակում Դեզիրե Դուեն ձևակերպեց վերջնական հաշիվը։

Ֆրանսիան այս մրցաշարում առայժմ լուրջ դիմադրության չի հանդիպել։ Թիմը հաղթեց I խմբում՝ գոլերի +8 տարբերությամբ, և 1/16 եզրափակչում կխաղա երրորդ տեղ զբաղեցրած թիմերից մեկի հետ։

Նորվեգիան, չնայած պարտությանը, հանգիստ զբաղեցրեց խմբի երկրորդ տեղը։ Ֆրանսիայի դեմ խաղում նորվեգացիները հանդես եկան ոչ հիմնական կազմով, բայց պահպանեցին իրենց դիրքը մրցաշարային աղյուսակում։ 1/16 եզրափակչում Նորվեգիան կխաղա Կոտ դ’Իվուարի դեմ։

Զուգահեռ խաղում Սենեգալը 5:0 հաշվով ջախջախեց Իրաքին։ Իրաքը դեռ առաջին խաղակեսում մնաց 10 հոգով և ընդմիջումից հետո չկարողացավ զսպել մրցակցի գրոհները։

Սենեգալի կազմում գոլեր խփեցին Լամինե Դիարան, Իսմայիլա Սարրը, Իլիման Նդիայեն, իսկ Պապա Գեյեն դուբլի հեղինակ դարձավ։ Հատկապես տպավորիչ էր սենեգալցիների երկրորդ խաղակեսը, երբ թիմը լիովին քանդեց Իրաքի պաշտպանությունը։

Սենեգալն արեց հնարավոր ամեն ինչ՝ երեք միավորով փլեյ-օֆֆ դուրս գալու համար։ Թիմն արդեն գոլերի տարբերությամբ շրջանցել է Հարավային Կորեային և Շոտլանդիային երրորդ տեղերի պայքարում, սակայն դեռ չի երաշխավորել իր մասնակցությունը 1/16 եզրափակչին։

Փլեյ-օֆֆ դուրս գալու համար Սենեգալին այժմ անհրաժեշտ են բարենպաստ արդյունքներ մյուս խմբերում՝ Կաբո Վերդեի ոչ-ոքի, ինչպես նաև Եգիպտոսի և Նոր Զելանդիայի պարտություններ։