Ջոն վան’թ Սխիպ. «Կփորձեմ հնարավորինս արագ հարմարվել Հայաստանում»
Հայաստանի ազգային հավաքականի գլխավոր մարզչի պաշտոնում պաշտոնապես նշանակվելուց հետո Ջոն վան’թ Սխիպը իր առաջին հարցազրույցը տվել է Հայաստանի ֆուտբոլի ֆեդերացիայի (ՀՖՖ) մամուլի ծառայությանը։ 61-ամյա հոլանդացի մասնագետը հայտնել է իր ուրախությունն ու պատրաստակամությունը՝ սկսել աշխատանքը ազգային թիմի հետ։
«Ես Ջոն վան’թ Սխիպն եմ, Հայաստանի ազգային հավաքականի նոր գլխավոր մարզիչը։ Շատ ուրախ եմ այստեղ գտնվելու համար, անհամբերությամբ սպասում եմ թիմի և ֆեդերացիայի աշխատակիցների հետ աշխատանքին։ Կփորձեմ հնարավորինս արագ հարմարվել Հայաստանում։ Շնորհակալություն շատ ջերմ ընդունելության համար։ Շուտով կհանդիպենք», – նշել է վան’թ Սխիպը։
Հայաստանի ֆուտբոլի ֆեդերացիան հայտարարել է փորձառու մարզչի նշանակման մասին՝ նրա հետ կնքելով 1+1 ձևաչափով պայմանագիր։ ՀՖՖ նախագահ Արմեն Մելիքբեկյանը մասնագետին ներկայացրել է ֆեդերացիայի գործկոմի անդամներին, որոնք միաձայն հաստատել են նրա թեկնածությունը։
Ակնկալվում է, որ վան’թ Սխիպը պաշտոնապես կստանձնի իր պարտականությունները 2025 թվականի մարտի 1-ին։