2026/27 մրցաշրջանի եվրագավաթների երկրորդ փուլի վիճակահանությունը
- Հեղինակ: Vahe Hakobyan
- Sportaran
Հունիսի 17-ին Նիոնում կկայանան 2026/27 մրցաշրջանի Չեմպիոնների լիգայի, Եվրոպա լիգայի և Կոնֆերենցիաների լիգայի երկրորդ որակավորման փուլերի վիճակահանությունները։ Հայկական ակումբները կիմանան իրենց հնարավոր մրցակիցներին՝ հաջորդ փուլ դուրս գալու դեպքում։
Չեմպիոնների լիգայի և Կոնֆերենցիաների լիգայի առաջին փուլերի վիճակահանություններն արդեն կայացել են։
Կոնֆերենցիաների լիգայում «Նոան» պայքարը կսկսի երկրորդ փուլից և հունիսի 17-ին կիմանա իր առաջին մրցակցին։ Հայաստանի գավաթակիրը կլինի դասակարգված թիմերի շարքում։ Հնարավոր մրցակիցների թվում կան ինչպես երկրորդ փուլից պայքարը սկսող թիմեր, այնպես էլ զույգեր, որոնց հաղթողները պետք է անցնեն առաջին փուլը։
«Փյունիկը» Կոնֆերենցիաների լիգայի առաջին փուլում կխաղա Մալթայի «Մարսաշլոկի» դեմ։ Երկրորդ փուլի վիճակահանությունում երևանյան ակումբը կլինի դասակարգված։
«Ալաշկերտը» առաջին փուլում կհանդիպի Ղազախստանի «Ելիմայի» հետ։ Երկրորդ փուլի վիճակահանությունում հայկական ակումբը կլինի չդասակարգված և կարող է ստանալ շատ բարդ մրցակիցների, այդ թվում՝ «Այաքսին», «Պանատինաիկոսին» և «Բրագային»։ Միևնույն ժամանակ կան նաև ավելի հարմար տարբերակներ, օրինակ՝ Ֆարերյան կղզիների «Տորսհավնը»։
Հայաստանի չեմպիոն «Արարատ-Արմենիան» Չեմպիոնների լիգայի առաջին փուլում կխաղա Լատվիայի «Ռիգայի» դեմ։ Հաջողության դեպքում հայկական ակումբը երկրորդ փուլի վիճակահանությունում կլինի չդասակարգված։ Հնարավոր մրցակիցների թվում կարող են լինել ուժեղ թիմեր, ինչպիսիք են «Ցրվենա Զվեզդան» և Զագրեբի «Դինամոն», սակայն կան նաև ավելի անցանելի տարբերակներ, օրինակ՝ «Լինքոլն» — «Ինտեր Էսկալդես» զույգի հաղթողը։
Պարտության դեպքում «Արարատ-Արմենիան» պայքարը կշարունակի Կոնֆերենցիաների լիգայի երկրորդ փուլում՝ Չեմպիոնների ուղիով։ Այդ դեպքում «Արարատ-Արմենիա» / «Ռիգա» զույգն արդեն կլինի դասակարգվածների թվում։
Վիճակահանությունը կմեկնարկի ժամը 14:00-ին։ Այն կարելի է դիտել ՈւԵՖԱ-ի պաշտոնական կայքում։