Զահիդ Վալենսիան գլխավորում է Երևանում կայանալիք մրցաշարի ԱՄՆ հավաքականի կազմը

ԱՄՆ հավաքականը հրապարակել է ազատ ոճի ըմբշամարտի Ստեփան Սարգսյանի անվան միջազգային մրցաշարի կազմը։ Մրցաշարը կանցկացվի Երևանում սեպտեմբերի 11–13-ը։

Ամերիկյան թիմը կներկայանա հինգ ըմբիշով՝ չորս քաշային կարգերում։ Կազմի գլխավոր աստղը կլինի մինչև 86 կգ քաշային կարգում աշխարհի գործող չեմպիոն Զահիդ Վալենսիան։

2026 թվականին Վալենսիան արդեն երեք միջազգային մեդալ է նվաճել։ Փետրվարին ամերիկացին բրոնզե մեդալակիր դարձավ Zagreb Open վարկանիշային մրցաշարում, այնուհետև հաղթեց «Դան Կոլով — Նիկոլա Պետրով» միջազգային մրցաշարում և Պանամերիկյան առաջնությունում։

ԱՄՆ հավաքականի կազմը

57 կգ — Կիլիեն Դելանի
65 կգ — Ջոի Մակքեննա
74 կգ — Քեմերոն Ամին
86 կգ — Զահիդ Վալենսիա
86 կգ — Իզակ Օլեյնիկ

Ամերիկյան թիմի կազմում առանձնանում է նաև Ջոի Մակքեննան՝ երիտասարդական տարիքային խմբերի աշխարհի առաջնությունների կրկնակի մեդալակիր և Պանամերիկյան առաջնության կրկնակի չեմպիոն։ Քեմերոն Ամինը նախկինում բազմիցս դարձել է NCAA-ի առաջնության մեդալակիր, իսկ Իզակ Օլեյնիկի համար Երևանում կայանալիք մրցաշարը կլինի միջազգային նորամուտը։

Ստեփան Սարգսյանի հուշամրցաշարը Հայաստանում անցկացվող միակ միջազգային ըմբշամարտի մրցաշարն է, որն ընդգրկված է Միավորված ըմբշամարտի աշխարհի (UWW) պաշտոնական օրացույցում։

Մրցաշարում նախատեսված է դրամական մրցանակային ֆոնդ։ Յուրաքանչյուր քաշային կարգի հաղթող կստանա 2000 ԱՄՆ դոլար, արծաթե մեդալակիրը՝ 1000 դոլար, իսկ բրոնզե մեդալակիրը՝ 500 դոլար։

Բացի այդ, յուրաքանչյուր չեմպիոնի անձնական մարզչին կվճարվի 500 ԱՄՆ դոլար։

Ամերիկացի ըմբիշները մրցելույթները կսկսեն սեպտեմբերի 11-ին։ Այդ օրը կկայանան 57, 65, 74 և 86 կգ քաշային կարգերի նախնական փուլերն ու կիսաեզրափակիչ գոտեմարտերը։ ԱՄՆ ներկայացուցիչների մասնակցությամբ մեդալային գոտեմարտերը նախատեսված են սեպտեմբերի 12-ին։