Ողբերգություն Իսպանիայում. Հրանտ-Լեոն Ռանոսի թիմակիցը մահացել է դարպասապահի հետ բախումից հետո

Նոյեմբերի 3-ին, 30 տարեկան հասակում, մահացել է իսպանական «Տեներիֆեի» հարձակվող Խեսուս դե Միգելը։ Ֆուտբոլիստը մահացել է հիվանդանոցում՝ Իսպանիայի Սեգունդայի 12-րդ տուրի՝ «Անդորրայի» դեմ խաղում մրցակցի դարպասապահ Խեսուս Օվոնոյի հետ ծանր բախումից հետո։

Ողբերգական միջադեպը տեղի է ունեցել նոյեմբերի 2-ին՝ «Տեներիֆե» – «Անդորրա» հանդիպման վերջնամասում։ Գնդակի համար պայքարի ընթացքում հյուրերի դարպասապահ Խեսուս Օվոնոն բախվել է դե Միգելի հետ՝ ուժեղ հարված հասցնելով նրա կրծքավանդակի հատվածին։

Բախումից հետո 30-ամյա հարձակվողը կորցրել է գիտակցությունը։ Ֆուտբոլիստի սիրտը կանգ է առել։ Բժիշկները վերակենդանացման միջոցառումներ են իրականացրել և կարողացել վերականգնել նրա սրտի աշխատանքը, ինչից հետո խաղացողը շտապ տեղափոխվել է հիվանդանոց։

Հանդիպումը դադարեցվել է 2:2 հաշվի ժամանակ և այլևս չի վերսկսվել։

Դե Միգելը գտնվել է Նուեստրա Սենյորա դե լա Կանդելարիա համալսարանական հիվանդանոցի վերակենդանացման բաժանմունքում։ Չնայած բժիշկների ջանքերին՝ ֆուտբոլիստի վիճակը վատթարացել է։ Նոյեմբերի 3-ի առավոտյան՝ տեղական ժամանակով ժամը 08:00-ին, նա մահացել է։

Ֆուտբոլիստի մահվան մասին պաշտոնապես հայտնել է «Տեներիֆեն»։ Ակումբը խորին ցավակցություն է հայտնել հարձակվողի ընտանիքին և հարազատներին՝ խնդրելով այս ծանր պահին հարգել նրանց անձնական կյանքը։

Հիշեցնենք, որ «Տեներիֆեում» է հանդես գալիս նաև Հայաստանի ազգային հավաքականի հարձակվող Հրանտ-Լեոն Ռանոսը, որը ողբերգական հանդիպման ընթացքում մնացել էր պահեստայինների նստարանին։

Խեսուս դե Միգելը 30 տարեկան էր։