Տիգրան Ավանեսյանը դիտարկում կանցնի «Օրենբուրգում»

Տուլայի «Արսենալի» և Հայաստանի ազգային հավաքականի հենակետային կիսապաշտպան Տիգրան Ավանեսյանը կարող է շարունակել իր կարիերան Ռուսաստանի Պրեմիեր լիգայում։

Ինչպես հայտնում է Telegram-ի «ФНЛ с Ильёвым» ալիքը, 23-ամյա ֆուտբոլիստը այսօր պետք է ժամանի «Օրենբուրգի» ճամբար, որտեղ կանցնի դիտարկում։ Առկա տեղեկությունների համաձայն՝ տուլյան ակումբը համաձայնություն է տվել խաղացողի մասնակցությանը ՌՊԼ թիմի ուսումնամարզական հավաքին։

Նշվում է, որ «Արսենալի» համար ավելի նախընտրելի տարբերակ կլիներ Ավանեսյանի լիարժեք տեղափոխությունը Սարատովի «Սոկոլ», որը նախկինում կոնկրետ հետաքրքրություն էր ցուցաբերել ֆուտբոլիստի նկատմամբ։ Սակայն այժմ սարատովյան ակումբը ստիպված կլինի դադար վերցնել, քանի որ Հայաստանի հավաքականի խաղացողը դիտարկվում էր որպես հիմնական թեկնածու հենակետային կիսապաշտպանի դիրքի համար, հատկապես «Տորպեդոյի» Վլադիմիր Մոսկվիչևի հետ բանակցությունների սառեցման ֆոնին։

Ընթացիկ մրցաշրջանում Ավանեսյանը «Արսենալ Տուլայի» կազմում Ռուսաստանի Առաջին լիգայում անցկացրել է 15 հանդիպում։ Նրա ակտիվում կա նաև Հայաստանի ազգային հավաքականի կազմում անցկացրած երեք խաղ։

Հիշեցնենք, որ «Օրենբուրգում» արդեն հանդես է գալիս ևս մեկ հայ կիսապաշտպան՝ Պավել Գորելովը, ով նախկինում պաշտպանել է Հայաստանի երիտասարդական հավաքականի գույները։