Դատարանը կասեցրել է Հայաստանի առաջնությունում լեգեոներների սահմանափակման գործողությունը
- Հեղինակ: Vahe Hakobyan
- Sportaran
Երևանի քաղաքացիական դատարանը, որպես հայցի ապահովման միջոց, կասեցրել է Հայաստանի ֆուտբոլի ֆեդերացիայի կանոնակարգի այն դրույթների գործողությունը, որոնք սահմանափակում են ակումբների հայտացուցակներում օտարերկրյա ֆուտբոլիստների քանակը։
Որոշումն ընդունվել է ՀՖՖ Գործադիր կոմիտեի անդամ և «Նոա» ՖԱ-ի զարգացման տնօրեն Աննա Օհանյանի՝ Հայաստանի ֆուտբոլի ֆեդերացիայի դեմ ներկայացրած հայցի շրջանակում ընթացող դատական վարույթի ընթացքում։
Այսպիսով, այս պահին Հայաստանի առաջնության ակումբները կարող են գրանցել օտարերկրյա ֆուտբոլիստների՝ առանց նոր կանոնակարգով սահմանված քանակական սահմանափակման։
Խոսքը սահմանափակման մասին է, ըստ որի՝ ակումբներին թույլատրվում էր մրցաշրջանային հայտացուցակում ընդգրկել առավելագույնը 15 օտարերկրյա ֆուտբոլիստ՝ հաշվի առնելով առաջին և երկրորդ թիմերը։
Ավելի վաղ հաղորդվել էր, որ Աննա Օհանյանը դիմել է դատարան՝ պահանջելով անվավեր ճանաչել ՀՖՖ Գործադիր կոմիտեի 2026 թվականի հունիսի 27-ի՝ «2026/27 մրցաշրջանի ՀՖՖ պրոֆեսիոնալ ֆուտբոլային մրցումների անցկացման կանոնակարգը հաստատելու մասին» որոշումը։
Հայցի հիմք են հանդիսացել կանոնակարգի ընդունման ընթացքում ենթադրաբար թույլ տրված խախտումները։
Կարևոր է նշել, որ առայժմ խոսքը միայն հայցի ապահովման միջոցի մասին է. դատարանը կասեցրել է կանոնակարգի համապատասխան դրույթների գործողությունը գործի քննության ընթացքում։ Աննա Օհանյանի հայցով վերջնական որոշում դեռ չի կայացվել։