Սպերցյանը խոսել է «Մարսելի» հետաքրքրության և Եվրոպա տեղափոխվելու հավանականության մասին

«Կրասնոդարի» ավագ և Հայաստանի ազգային հավաքականի կիսապաշտպան Էդուարդ Սպերցյանը մեկնաբանել է ֆրանսիական «Մարսելի» կողմից իր նկատմամբ հնարավոր հետաքրքրության մասին լուրերը, ինչպես նաև խոսել եվրոպական ակումբ տեղափոխվելու հեռանկարի վերաբերյալ իր վերաբերմունքի մասին։

Վերջին շրջանում լրատվամիջոցներում տեղեկություններ էին հայտնվում, որ «Մարսելը» կարող է դիտարկել 25-ամյա հայ ֆուտբոլիստի թեկնածությունը ամառային տրանսֆերային պատուհանի ընթացքում։ Ինքը՝ Սպերցյանը, «О, родной футбол!» YouTube-յան ալիքին տված հարցազրույցում հայտարարել է, որ առաջին անգամ է լսում նման տարբերակի մասին։

«Մարսելում մեծ հայկական սփյուռք կա», — ժպիտով նշել է Սպերցյանը, ապա հավելել, որ իրականում տեղեկություն չունի ֆրանսիական ակումբի հետաքրքրության մասին։

Ֆուտբոլիստը նաև պատասխանել է իր ապագայի և «Կրասնոդարից» հնարավոր հեռանալու վերաբերյալ հարցին։ Սպերցյանի խոսքով՝ նա դեռ նախորդ մրցաշրջանում երկարաձգել է պայմանագիրը ռուսական ակումբի հետ, թեև այդ տեղեկությունը նախկինում հրապարակայնորեն չէր հայտարարվել։

Միևնույն ժամանակ կիսապաշտպանը չի թաքցնում, որ ցանկանում է ուժերը փորձել Եվրոպայում։ Սպերցյանը շեշտել է, որ այս հարցում իր դիրքորոշումը չի փոխվել․ եթե իսկապես լավ առաջարկ լինի, կողմերը կարող են նստել բանակցությունների սեղանի շուրջ։

«Ես, իհարկե, ցանկանում եմ ինձ փորձել Եվրոպայում, բայց կտեսնենք՝ ինչպես կստացվի։ Եթե լավ առաջարկ լինի, կնստենք և կպայմանավորվենք», — ասել է Սպերցյանը։

Ընթացիկ մրցաշրջանում Էդուարդ Սպերցյանը շարունակում է մնալ «Կրասնոդարի» առանցքային ֆուտբոլիստներից մեկը։ Բոլոր մրցաշարերում նա անցկացրել է 41 հանդիպում, դարձել 14 գոլի և 18 գոլային փոխանցման հեղինակ։ Կիսապաշտպանի գործող պայմանագիրը ակումբի հետ նախատեսված է մինչև 2029 թվականը։

Transfermarkt պորտալի տվյալներով՝ «Կրասնոդարի» ավագի տրանսֆերային արժեքը գնահատվում է 25 միլիոն եվրո։ Սպերցյանը շարունակում է մնալ ամենաթանկ և պահանջված հայ ֆուտբոլիստներից մեկը, իսկ նրա՝ եվրոպական առաջնություն հնարավոր տեղափոխության թեման շարունակում է արդիական մնալ արդեն ոչ առաջին մրցաշրջանը։