Սենեգալն ու Մարոկկոն կհանդիպեն Աֆրիկայի գավաթի 2025 թվականի եզրափակչում

Հունվարի 14-ին Մարոկկոյում կայացան Աֆրիկայի ազգերի գավաթի 2025 թվականի կիսաեզրափակիչ հանդիպումները, որոնց արդյունքում պարզ դարձան մրցաշարի եզրափակչի մասնակիցները։ Եզրափակչում կմրցեն Սենեգալի և Մարոկկոյի հավաքականները։

Առաջին կիսաեզրափակչում Սենեգալը նվազագույն հաշվով՝ 1:0, հաղթեց Եգիպտոսին։ Խաղում միակ գոլը խփեց թիմի առաջատար Սադիո Մանեն, ով հերթական անգամ վճռորոշ դեր խաղաց «Տերանգայի առյուծների» հաջողության մեջ։

Երկրորդ կիսաեզրափակչում մրցաշարի տանտեր Մարոկկոն հանդիպեց Նիգերիայի հավաքականին։ Հիմնական և լրացուցիչ ժամանակները ավարտվեցին 0:0 հաշվով, իսկ հետխաղյա 11-մետրանոցների շարքում վճռորոշ դարձավ դարպասապահ Յասին Բունուի խաղը, ով հետ մղեց երկու հարված և իր թիմին դուրս բերեց եզրափակիչ։

Մարոկկոյի համար սա կլինի Աֆրիկայի գավաթի պատմության մեջ ընդամենը երրորդ եզրափակիչը և առաջինը՝ 2004 թվականից հետո։ Տնային մրցաշարում մարոկկացիները կարողացան հասնել վճռորոշ հանդիպմանը՝ չնայած սպասումների բարձր ճնշմանը։ Մարոկկոյի հավաքականը Աֆրիկայի գավաթը հաղթել է միայն մեկ անգամ՝ 1976 թվականին։

Սենեգալը, իր հերթին, կխաղա իր չորրորդ եզրափակիչում։ Նախկինում թիմը հասել է եզրափակիչ 2002, 2019 և 2021 թվականներին։ Սենեգալցիների միակ տիտղոսը նվաճվել է 2021 թվականին։

Եզրափակիչ հանդիպումը կկայանա հունվարի 18-ին Ռաբաթում։ Նույն օրը Եգիպտոսն ու Նիգերիան կխաղան երրորդ տեղի համար։