Կիպրոսի հավաքականը հրապարակել է Հայաստանի դեմ խաղի հայտացուցակը․ «Փյունիկի» հարձակվող Պիկիսն առաջին անգամ հրավիրվել է հավաքական

Կիպրոսի ազգային հավաքականի գլխավոր մարզիչ Ապոստոլոս Մանցիոսը հրապարակել է Ազգերի լիգայի խմբային փուլի վերջին հանդիպումներին՝ Հայաստանի և Չեռնոգորիայի դեմ խաղերին հրավիրված 27 ֆուտբոլիստների ցանկը։ Առաջին անգամ ազգային հավաքական է հրավիրվել Երևանի «Փյունիկի» 25-ամյա հարձակվող Յասոնաս Պիկիսը։

Պիկիսը Հայաստանի առաջնությունում արդյունավետ մրցաշրջան է անցկացնում և դարձել է «Փյունիկի» հարձակման գծի առանցքային ֆուտբոլիստներից մեկը։ Պրեմիեր լիգայի 13-րդ տուրում «Վանի» դեմ վերջին խաղում (3:0) կիպրացի հարձակվողը գոլի հեղինակ դարձավ։ Դա նրա իններորդ գոլն էր Հայաստանի ընթացիկ առաջնությունում։

Այժմ հարձակվողը հնարավորություն է ստացել նորամուտը նշելու ազգային հավաքականում հենց Երևանում, որտեղ հանդես է գալիս ակումբային մակարդակով։

Պիկիսից բացի, Կիպրոսի հավաքական առաջին անգամ հրավիրվել են նաև երկու ֆուտբոլիստներ՝ Զանո Սավվան և Մորգան Բրաունը։ Վերջինս ծնվել է Անգլիայում, ավելի քան հինգ տարի հանդես է եկել Կիպրոսի առաջնությունում և վերջերս ստացել է Կիպրոսի քաղաքացիություն։

Կիպրոսի հավաքականի ամբողջական կազմը նոյեմբերյան հանդիպումների համար

Դարպասապահներ․ Ֆրեյտաս, Պարասկևաս, Մոլ։

Պաշտպաններ․ Լաիֆիս, Պիլեաս, Անտոնիու, Մալեկիդիս, Կոնոմիս, Պանայոտու, Կիպրիանու, Ցարուլաս։

Կիսապաշտպաններ․ Կաստանոս, Արտիմատաս, Կիրիակու, Կոստի, Անդրեու, Մորգան Բրաուն, Խարալամբուս։

Հարձակվողներ․ Պիտտաս, Լոիզու, Ցիոնիս, Կակուլիս, Նեոֆիտու, Գեորգիու, Էդվարդս, Սավվա, Պիկիս։

Կիպրոսի հավաքականը առաջիկա հանդիպումների նախապատրաստությունը կսկսի նոյեմբերի 9-ին։

Հայաստան – Կիպրոս հանդիպումը կկայանա նոյեմբերի 12-ին Երևանում՝ Ազգերի լիգայի խմբային փուլի նախավերջին տուրի շրջանակում։ Վերջին տուրում՝ նոյեմբերի 15-ին, կիպրացիները Լիմասոլում կընդունեն Չեռնոգորիայի հավաքականին։

Կիպրոսի հավաքականի համար առաջիկա հանդիպումները կարևոր նշանակություն ունեն մրցաշարային տեսանկյունից․ թիմը շարունակում է պայքարը C2 խմբում առաջին տեղի համար։